उद्रेक न्युज वृत्त
देसाईगंज(गडचिरोली) :-अखिल महाराष्ट्र राज्य स्वस्त धान्य दुकानदार व केरोसीन परवानाधारक महासंघ,पुणेच्या वतीने प्रलंबित मागण्यांसाठी शासनाचे लक्ष वेधावे व शासनाकडून तात्काळ कार्यवाही व्हावी; यासाठी आंदोलनात्मक कार्यक्रम आज राज्यभर हाती घेण्यात आला.त्यानुसार आज,गुरुवार दिनांक-२७ जून ला सकाळी ११ वाजता देसाईगंज स्वस्त धान्य दुकानदार संघटनेच्या वतीने तहसील कार्यालय देसाईगंज समोर एक दिवसीय धरणे आंदोलन करून प्रलंबित मागण्यांचे निवेदन तहसीलदार यांच्या मार्फत राज्य शासनाला सादर करण्यात आले.
अखिल महाराष्ट्र राज्य स्वस्त धान्य दुकानदार व केरोसीन परवानाधारक महासंघ ही ऑल इंडिया फेअर प्राईज शॉप डिलर फेडरेशन नवी दिल्लीशी संलग्न संस्था असून स्वस्त धान्य दुकानदारांच्या अडचणी,मागण्या,समस्या तसेच शासन निर्णयांची अंमलबजावणी करणारे प्रमुख घटक आहे.मागील बऱ्याच वर्षांपासून स्वस्त धान्य दुकानदार केरोसीन परवानाधारकांच्या मागण्या,अडचणी,समस्या यावर महाराष्ट्र राज्यातील शासनाकडून कोणतीही कार्यवाही व निर्णय घेण्यात आलेला नाही.अन्न नागरी पुरवठा मंत्री यांच्या उपस्थितीत दि.१० जानेवारी २०२४ रोजी राज्यातील संघटनेच्या पदाधिकाऱ्यांची महत्त्वपूर्ण बैठक पार पडली.सदरच्या बैठकीत राज्यातील धान्य दुकानदारांच्या तसेच मार्जीनमध्ये ५० रूपयांची वाढ करण्याबाबत सकारात्मक चर्चा झाली.तसेच लवकरच त्याची अंमलबजावणी करण्यात येईल,असे सुतोवाच मंत्र्यांकडून करण्यात आले होते.परंतु आजपर्यंत या विषयावर कोणतीही चर्चा किंवा बैठकही झाली नाही. त्यामुळे स्वस्त धान्य दुकानदारांच्या अडचणी,समस्या व इतर प्रश्नांकडे शासन अक्षम्य दुर्लक्ष करीत आहे. यासाठी देसाईगंज स्वस्त धान्य दुकानदार संघटनेच्या वतीने प्रलंबित मागण्यांसाठी शासनाचे लक्ष वेधून एक दिवसीय धरणे आंदोलन पुकारून निवेदन सादर करण्यात आले.
धरणे आंदोलनात देसाईगंज स्वस्त धान्य दुकानदार संघटनेचे तालुका सचिव अरुण कुंभलवार,तालुका उपाध्यक्ष सुरेश दुनेदार,कार्याध्यक्ष वासुदेव दुफारे तसेच तालुक्यातील संपूर्ण स्वस्त धान्य दुकानदार उपस्थित होते.
