उद्रेक न्युज वृत्त
नागपूर :-पत्नीचे दुसऱ्या पुरुषासोबत प्रेमसंबंध असल्याची बाब उघडकीस आल्यामुळे पतीने पत्नीवर सळाखीने वार करून तिला संपविल्याची घटना कपिलनगर पोलिस ठाण्याच्या हद्दीत मंगळवारी दि. २५ च्या रात्री ८:३५ ते ९:१० वाजताच्या सुमारास घडली.यामुळे आरोपी आणि मृत महिलेचा दोन वर्षांचा चिमुकला पोरका झाला आहे.
मन्नत ऊर्फ मिनू दिलप्रीत कौर विर्क वय २४ वर्षे,असे हत्या झालेल्या महिलेचे नाव आहे,तर दिलप्रीत ऊर्फ विक्की कुलविंदरसिंग विर्क वय ३० वर्षे,रा.पंचमवेद्य आर्य सोसायटी, दीक्षितनगरजवळ, कपिलनगर असे आरोपी पतीचे नाव आहे.दोघांचाही २०२२ मध्ये प्रेम विवाह झाला असून,त्यांना एक २ वर्षांचा मुलगाही आहे.आरोपी दिलप्रीतचे चारचाकी वाहनांच्या ॲसेसरीज व स्पेअर पार्टचे दुकान आहे.मन्नतचे एका युवकासोबत प्रेमसंबंध निर्माण झाले.काही दिवसांपूर्वी दिलप्रीतला सदर परिसरात मन्नत एका युवकासोबत फिरताना आढळली.त्यामुळे त्याने मन्नतचा भाऊ विशाल प्रकाश हरजानी वय २० वर्षे,रा.हुडको कॉलनी,जरीपटका याला फोन करून मन्नतसोबत घटस्फोट घ्यायचा असून,त्याबद्दल बोलणी करण्यासाठी बोलावले.त्यानंतर आरोपी दिलप्रीतचा मन्नतसोबत मंगळवारी रात्री तिच्या प्रेमसंबंधावरून पुन्हा वाद झाला.रागाच्या भरात दिलप्रितने लोखंडी सळईने मन्नतच्या डोक्यावर वार करून तिला रक्ताच्या थारोळ्यात लोळवले.त्यानंतर आरोपी दिलप्रीत घराला कुलूप लावून निघून गेला.इकडे मन्नतचा भाऊ आणि तिच्या मैत्रिणीने मन्नतशी संपर्क साधला असता,तिने प्रतिसाद दिला नाही.त्यामुळे त्यांना शंका आली.त्यांनी पोलिसांसोबत जाऊन मन्नतच्या घराचे दार तोडून आत बघितले असता,ती रक्ताच्या थारोळ्यात पडलेली दिसली.तिला उपचारासाठी मेयो रुग्णालयात दाखल केले असता,डॉक्टरांनी तपासून मृत घोषित केले. याप्रकरणी मन्नतचा भाऊ विशालने दिलेल्या तक्रारीवरून कपिलनगर पोलिसांनी आरोपी दिलप्रीतविरुद्ध कलम ३०२ नुसार गुन्हा दाखल करून त्यास अटक केली.
