तिघांना वाचवले खरी; पण स्वतःच बुडाला.. – २० वर्षीय तरुणाचा खड्ड्यात बुडून मृत्यू..

चंद्रपूर :-मूर्तिकार म्हणून परिचित असलेल्या एका २० वर्षीय तरुणाचा तीन मुलांना खोल खड्ड्यातील पाण्यातून वाचविण्याच्या प्रयत्नात दुर्दैवी मृत्यू झाल्याची घटना काल बुधवारी सकाळच्या सुमारास चंद्रपूर जिल्ह्याच्या चिमूर तालुक्यातील पुयारदंड शिवारात घडली.आयुष नरेश बावणे वय २० वर्षे,रा.जुनी भिसी, ता.चिमूर,जि.चंद्रपूर असे खड्ड्यातील पाण्यात बुडून मृत पावलेल्या तरुणाचे नाव आहे,तर १२ वर्षीय दादू रामा वाघधरे,१३ वर्षीय सुमेद सुनिल दिघोरे व समीर वामन मेश्राम रा.चांभार मोहल्ला भिसी,ता.चिमूर अशी मृतक आयुष बावणे याने वाचविलेल्या मुलांची नावे आहेत.

आयुष बावणे व काही मित्र मंडळी नेहमीप्रमाणे काल बुधवारी सकाळच्या सुमारास भिसी येथील चौरस्ता मैदानावर कसरत(व्यायाम)करण्यासाठी गेले होते.कसरत करून झाल्यानंतर परिसराला लागून असलेल्या मुरूम खाणीतील एका खड्ड्यातील पाण्यात पोहण्यासाठी उतरले.पोहत असतांनाच सोबत असलेली तीन मुले खोल पाण्यात गेल्याने वाचवा-वाचवा म्हणून ओरडू लागले. त्यामुळे आयुषने त्यांच्याकडे धाव घेत तिघांनाही वाचवले.मात्र,स्वतःच खोल पाण्यात बुडाला.यातच त्याचा करून अंत झाला.घटनेने परिसरात शोककळा पसरली असून आयुषचा मृतदेह पाहून कुटुंबीयांनी एकच हंबरडा फोडला.