चक्क मुख्य मार्गावरच वाघाचा ठिय्या; वाहने थांबली जाग्यावरच..

चंद्रपूर :-वाघांचा जिल्हा म्हणून ओळख असलेल्या चंद्रपूर जिल्ह्याच्या चंद्रपूर-मुल या राष्ट्रीय महामार्ग क्रमांक-९३० वरील अगडी फायरलाईन परिसरात आज, गुरुवारी दुपारच्या सुमारास चक्क मुख्य मार्गावरच वाघाने ठिय्या मांडल्याने चंद्रपूरहून मुलकडे आणि मुलकडून चंद्रपूरकडे जाणारी वाहने जाग्यावरच थांबली.वाघ रस्त्याच्या मधोमध शांतपणे बसलेला असतांनाच अनेक वाहनचालक आणि पर्यटकांनी सुरक्षित अंतर राखून दर्शन घेतले.सदरचा परिसर हा ताडोबा-अंधारी व्याघ्र प्रकल्पाच्या बफर क्षेत्राला लागूनच असल्याने परिसरात नेहमीच वन्यप्राण्यांचे दर्शन होत असते.वाघाने ठिय्या मांडल्याने तब्बल अर्धा तास महामार्गावरील वाहतूक बंद होती.

चंद्रपूर-मुल या महामार्गावरील आगडी फायरलाईन येथे “मामा मेल” या प्रसिद्ध वाघाने या भागात दोन बैलांची शिकार केली होती.त्यामुळे त्याचा राष्ट्रीय महामार्गाच्या जवळ वावर होता.मामा मेल हा अतिशय धीट वाघ असून वाहने आणि माणसांच्या उपस्थितीची पर्वा न करता मुक्तसंचार करतो.त्यामुळे त्याने दुपारच्या सुमारास महामार्गावर ठिय्या केल्याने सुमारे अर्धा तास वाहतूक ठप्प होती.वन विभागाचे कर्मचारी पूर्णवेळ परिस्थितीवर लक्ष ठेवून होते.वन कर्मचाऱ्यांनी वाहने आणि वाघ यांच्यात सुरक्षित अंतर ठेवून,रस्त्यावर लोकांची अनावश्यक गर्दी होणार नाही याची काळजी घेतली.वाघाला हुसकावून न लावता,तो स्वतःहून कधी पुन्हा जंगलात जातो,यासाठी वेळ घेतला.साधारण अर्धा तास शांतपणे बसल्यानंतर ‘मामा मेल’ वाघ स्वतःच्या मर्जीने रस्त्यावरून उठून जंगलाच्या दिशेने निघून गेला.