ग्रामसेवक रामटेके लाच लुचपत प्रतिबंधक विभागाच्या जाळ्यात..

चंद्रपूर :-जिल्ह्याच्या सावली तालुक्याच्या लोंढोली ग्रामपंचायत येथे कार्यरत ग्रामसेवक चंद्रशेखर केशव रामटेके यास १० हजाराची लाच घेतांना लाच लुचपत प्रतिबंधक विभागाने अटक केल्याची घटना महाशिवरात्रीच्या दिवशी म्हणजेच बुधवारी २६ फेब्रुवारीला उघडकीस आल्याने परिसरात एकच खळबळ उडाली.

माहितीनुसार,प्रधानमंत्री आवास योजनेंर्गत घरकुल मंजूर झालेल्या तक्रारदारास दुसऱ्या हप्त्याची रक्कम काढून देण्यासाठी रामटेके यांनी २० हजाराची लाच मागितली होती.अगोदरच शासनाकडून घरकुल बांधकामासाठी दिली जाणारी रक्कम तुटपुंज्या स्वरूपात असल्याने बरेच लाभार्थी जुळवा-जुळव करून घरकुलाचे बांधकाम पूर्णत्वास नेण्यासाठी प्रयत्न करीत असतात.अशातच तक्रारदारास लाच देण्याची मुळीच इच्छा नसल्याने त्याने याबाबत चंद्रपुरच्या लाच लुचपत प्रतिबंधक विभागाकडे तक्रार दाखल केली होती.मंगळवार २५ फेब्रुवारीला दिलेल्या तक्रारी संदर्भात लाच लुचपत प्रतिबंधक विभागाने तक्रारीची पडताळणी केली व त्यानुसार सापळा रचला.२० हजार रुपयांपैकी तडजोडीअंती १० हजार रुपये देण्याचे ठरले.त्यानुसार लाचलुचपतने सापळा रचून रामटेके यांस १० हजाराची लाच घेतांना रंगेहाथ अटक केली.सदरची कारवाई पोलीस अधीक्षक डॉ.दिगंबर प्रधान,अप्पर पोलीस अधीक्षक संजय पुरंदरे यांच्या मार्गदर्शनाखाली पोलीस उपअधीक्षक मंजुषा भोसले,नरेशकुमार नन्नावरे,हिवराज नेवारे,प्रदीप ताडाम,पुष्पा काचोळे,संदिप कौरासे यांनी केली.