उद्रेक न्युज वृत्त
भंडारा :- जवाहरनगर आयुध निर्माणी(ऑर्डनन्स फॅक्टरी) कंपनीत शनिवारी सकाळी ८.३० वाजता डीबीडब्ल्यू विभागात स्फोट होवून अविनाश भागवत मेश्राम (५०) या कर्मचाऱ्याचा मृत्यू झाला होता.शवविच्छेदन झाल्यानंतर काल सकाळी ११ वाजता शोकाकूल वातावरणात त्यांच्या पार्थिवावर अंत्यसंस्कार करण्यात आले.विशेष म्हणजे या स्फोट प्रकरणाच्या चौकशीसाठी पुणे येथील मुख्यालयातून तज्ज्ञ अधिकाऱ्यांची चमू जवाहरनगर आयुध निर्माणीत तपास व चौकशीसाठी दाखल झाली आहे.आयुध निर्माणीत झालेला स्फोट व कामगाराच्या मृत्यूमुळे कर्मचाऱ्यांत दहशत व भीतीचे वातावरण असून ही धाकधूक कर्मचाऱ्यांच्या चेहऱ्यावर स्पष्ट दिसून आले.सुरक्षेच्या कारणावरून अंत्यसंस्कारावेळी कुजूबूज व चर्चा सुरू होती.
शनिवारी ही घटना घडल्यानंतर स्फोटाच्या कारणांसह कामगाराच्या मृत्यूच्या चौकशीसाठी वरिष्ठ अधिकाऱ्यांची त्रिसदस्यीय चौकशी समिती गठीत केल्याची माहिती आयुध निर्माणीचे डेप्युटी जनरल मॅनेजर यतीश कुमार यांनी दिली होती.तथापि कम्युनिशन्स इंडिया प्रायव्हेट लिमटेड, भारत सरकार रक्षा मंत्रालय पुणे येथील चिफ मॅनेजिंग डायरेक्टर रविकांत काल रविवारी आयुध निर्माणी जवाहरनगर येथे स्फोटप्रकरणी चौकशीसाठी दाखल झाले आहेत. त्यांनी घटनास्थळी भेट दिली.मीटिंग हॉल येथे कर्मचारी संघटनेच्या पदाधिकाऱ्यांशी या घटनेविषयी चर्चा केली.मृतक अविनाश यांना सामूहिक श्रद्धांजली अर्पण करून जवाहरनगर येथील मोक्षधामावर जाऊन अंतिम संस्कारला हजेरी लावली.यावेळी महाप्रबंधक सुनिल सप्रे व वरिष्ठ अधिकारी उपस्थित होते.
