उद्रेक न्युज वृत्त
कुरखेडा(गडचिरोली) :-पोत्यात वर पोहे व खाली सुगंधित तंबाखू टाकून छत्तीसगडहून आलेला टेम्पो कुरखेडा तालुक्यातील गोठणगाव येथे पोलिसांनी पकडला.यावेळी चालकास ताब्यात घेतले असून सुमारे २३ लाख रुपयांचा मुद्देमाल जप्त केला आहे.
ललितकुमार खेमचंद टंडण वय २५ वर्षे,रा. राजनांदगाव,छत्तीसगड असे आरोपीचे नाव आहे.तो टेम्पोतून सीजी ०८ एके-४२३८ क्रमांक असलेल्या वाहनातून छत्तीसगडहून गडचिरोलीमार्गे चंद्रपूरला जात असल्याची माहिती मिळाल्यावरून एसडीपीओ साहील झरकर यांनी गोठणगाव नाक्यावर सापळा लावला.टेम्पो आल्यावर झडती घेतली असता,त्यातील पोत्यात वर पोहे व खाली सुगंधित तंबाखू आढळून आले.सुमारे ८ लाख ९ हजार २८० रुपयांची तंबाखू, ३ लाख ८५ हजारांचे पोहे,मोबाइल, टेम्पो असा सुमारे २३ लाख ५० हजार ८८० रुपयांचा मुद्देमाल हस्तगत केला.चालक ललितकुमार खेमचंद ठंडण २५, रा राजनांदगाव, छत्तीसगड याला अटक करण्यात आली.
याप्रकरणी कुरखेडा पोलिस ठाण्यात गुन्हा नोंदविण्यात आला आहे.पोलीस उपनिरीक्षक दयानंद भोंबे हे तपास करीत आहेत.दरम्यान,जिल्ह्यातील गांजा, सुगंधित तंबाखू तस्करीचे छत्तीसगड कनेक्शन यापूर्वीही अनेकदा उघडकीस आलेले आहे.मात्र,पाळेमुळे खणून काढण्यात पोलिसांना यश येत नाही. या कारवाईनंतर रॅकेट उघडकीस येणार का, असा प्रश्न उपस्थित झाला आहे.
