शैक्षणिक कागदपत्रे परत करण्यासाठी पैश्याची मागणी; एसीबीचा सापळा.. – लाच प्रकरणी सेतू केंद्र चालक अटकेत..

भंडारा :-एका नोंदणीकृत बांधकाम कामगाराने महाराष्ट्र इमारत व इतर बांधकाम कामगार कल्याण मंडळातर्फे मुलास शिष्यवृत्ती मिळावी,यासाठी सेतू केंद्र चालकाकडे मूळ शैक्षणिक कागदपत्रे दिली.सदरची कागदपत्रे वारंवार मागणी करूनही परत केली जात नव्हती.उलट कागदपत्रे परत करण्यासाठी सेतू केंद्र चालकाने १२ हजार रुपयांची मागणी करून त्यातील ११ हजार रुपयांची लाच घेतल्याप्रकरणी भंडारा लाचलुचपत प्रतिबंधक विभागाने आज,मंगळवार १० फेब्रुवारी लाखनी येथील नेहा सेतू केंद्रचालकास रंगेहाथ अटक केली आहे.सतीश तुळशीराम मोटघरे वय ३५ वर्षे रा.सिंधी लाईन,लाखनी, जि.भंडारा असे लाच प्रकरणी अटक केलेल्या सेतू केंद्रचालकाचे नाव आहे.

तक्रारदार हे बांधकाम कामगार असून नोंदणीकृत कामगारांच्या मुलांना बांधकाम कामगार कल्याणकारी मंडळाकडून शिष्यवृत्ती मिळते.तक्रारदार यांनी सन २०२१ मध्ये शिष्यवृत्तीकरिता सतीश मोटघरे याच्या लाखनी येथील सेतू केंद्रातून आनलाईन अर्ज भरला होता.अर्ज भरतांना तक्रारदार यांनी सतीश मोटघरे याला मुलाच्या दहावीची मार्कलिस्ट,डोमिसाईल सर्टिफिकेट, शाळा सोडल्याचा दाखला,नॉन क्रीमीलेअर सर्टिफिकेट, आधार कार्ड,कामगार कार्ड सर्व ओरिजनल(मूळ) कागदपत्रे दिली होती.काम झाल्यानंतर तक्रारदार यांनी त्यांची मूळ कागदपत्रे परत करण्यासाठी सतीश मोटघरे याचेकडे वारंवार मागणी केली.परंतु,त्याने मूळ कागदपत्रे परत करण्यास टाळाटाळ केली.परत ३० जानेवारी रोजी तक्रारदार यांनी सतीश मोटघरे याच्या सेतू सेवा केंद्रात भेट घेत त्यांचे मूळ कागदपत्रे परत करण्याची विनंती केली.यावर सतीश मोटघरे याने मूळ कागदपत्रे परत करण्यासाठी सहाय्यक कामगार आयुक्त कार्यालय भंडारा येथील अधिकारी व स्वतः करिता १२ हजार रुपये लाचेची मागणी केली.प्रकरणी आज मंगळवारी भंडारा लाचलुचपत प्रतिबंधक विभागाच्या वतीने सापळा रचण्यात आला.सापळ्यात नेहा सेतू केंद्र, सिंधी लाईन चौक,लाखनी येथील सापळा कारवाई दरम्यान ११ हजार रुपये लाचेची रक्कम स्वीकारतांना सतीश मोटघरे याला अटक करण्यात आली.