देहव्यापाराचा अड्डा चालवणाऱ्या पती-पत्नीस अटक; दोन महिलांची सुटका..

नागपूर :-गरीब तरुणी-महिलांना पैशांचे आमिष दाखवून देहव्यापारासाठी प्रवृत्त करणाऱ्या पती- पत्नीचा गुन्हे शाखेच्या अनैतिक मानवी वाहतूकविरोधी पथकाने भांडाफोड करून पती-पत्नीस अटक केली आहे.सदरचा अड्डा हा नागपूरच्या पाचपावली पोलिस ठाण्याच्या हद्दीतील पंचशील नगर परिसरात सुरू होता.तौफिक नियाज कुरेशी व जोया तौफिक कुरेशी अशी आरोपींची नावे असून हे दोन्ही आरोपी महिलांना ग्राहकांकडे सोडण्यासाठी राणी दुर्गावती चौकातील पेट्रोल पंपाच्या दिशेने जाणार असल्याची गोपनीय माहिती पोलिसांना मिळाली होती.त्यानुसार,पथकाने सापळा रचून पाठलाग केला आणि रस्त्यातच दोघांना अडवले.त्यांच्यासोबत असलेल्या दोन महिलांची चौकशी केली असता आरोपी त्यांना देहव्यापारासाठी ग्राहकांकडे नेत असल्याचे पीडितांनी सांगितले.यानंतर चौघांनाही पाचपावली पोलिस ठाण्यात नेण्यात आले.सुटका करण्यात आलेल्या महिलांना वैद्यकीय तपासणीसाठी मेयो रुग्णालयात पाठविण्यात आले.प्रकरणी पोलीस तपासात तौफिक हा जोयाचा दुसरा पती असल्याचे निष्पन्न झाले.दोघेही गरीब तरुणी व महिलांच्या आर्थिक अडचणींचा गैरफायदा घेत त्यांच्याकडून देहव्यवसाय करून घेत होते.प्रकरणी आरोपी पती-पत्नी विरोधात गुन्हा दाखल करण्यात आला आहे.