शेतात जात असतांना कोंडा भरलेला ट्रक अचानक अंगावर उलटला; वृध्द जागीच ठार – इसापूर इटखेडा येथील देसाईगंज ते कोहमारा राज्य मार्गावरील घटना..

गोंदिया :-शेतात जात असतांना कोंडा भरलेला ट्रक अचानक अंगावर उलटल्याने त्याखाली दबून वृद्ध जागीच ठार झाल्याची घटना अर्जुनी-मोरगाव तालुक्यातील इसापूर इटखेडा येथील देसाईगंज(वडसा) ते कोहमारा या राज्य मार्गावरील टी पॉइंट जवळ काल,सोमवारी ९ डिसेंबरच्या दुपारी १ वाजताच्या दरम्यान घडली.वासुदेव विठोबा लांजेवार वय ६५ वर्षे असे ठार झालेल्या वृद्धाचे नाव आहे.

कोंडा भरलेला ट्रक क्रमांक- एमएच ४९-एटी ३२५९ हा देसाईगंज(वडसा)मार्गाकडे जात होता.तर वासुदेव लांजेवार हे आपल्या शेताकडे राज्य मार्गावरील इसापूर टी-पॉइंट चौकातून पायी जात होते व त्याच क्षणी कोंडा भरलेला ट्रक त्यांच्या अंगावर पडल्याने त्याखाली दबून ते जागीच ठार झाले.अपघाताची माहिती मिळताच पोलिस निरीक्षक कमलेश सोनटक्के आपल्या ताफ्यासह घटनास्थळी दाखल झाले. ट्रकखाली दबलेल्या वासुदेव यांचा मृतदेह बाहेर काढून उत्तरीय तपासणीसाठी अर्जुनी-मोरगाव येथील ग्रामीण रुग्णालयात हलविण्यात आला.याप्रकरणी मृताचा भाऊ देवराम विठोबा लांजेवार यांच्या तक्रारीवरून भारतीय न्याय संहिता कलम २८१,१०६ (१) सहकलम मोटार वाहन कायदा १८४ अन्वये ट्रक चालकाविरोधात गुन्हा नोंदविण्यात आला आहे. अपघातग्रस्त ट्रक पोलिस ठाण्यात जमा करण्यात आला असून घटनेचा पुढील तपास पोलिस निरीक्षक सोनटक्के यांच्या मार्गदर्शनात पोलिस उपनिरीक्षक अश्विनी कदम करीत आहेत.