जंगली हत्तींचा धुमाकूळ; तीन शेतकऱ्यांवर हल्ला..

गोंदिया :-जंगली हत्तींच्या कळपाने गडचिरोली जिल्ह्याच्या कुरखेडा तालुक्यात धुडगूस घालत कुरखेडा मार्गावरून ११ मार्च २०२६ रोजी गोंदिया जिल्ह्याच्या अर्जुनी-मोरगाव तालुक्यात शिरकाव केला.गुरुवार १२ मार्चच्या सकाळी हत्तींच्या कळपाचे लोकेशन गोंदिया जिल्ह्यातील केशोरी वनक्षेत्रात आढळून आले.हत्तींच्या कळपाने अर्जुनी-मोरगाव तालुक्यातील वडेगाव बंध्या येथील शेतशिवारातील मक्याचे पीक उद्ध्वस्त करून हत्तींनी लगतच्या जंगलात ठाण मांडले होते.११ मार्च रात्रीच्या वेळी हत्तीच्या कळपाने शेत शिवारातील उभ्या मक्याच्या पिकाचे मोठ्या प्रमाणात नुकसान केले होते. अशातच अर्जुनी-मोरगाव तालुक्यातील गोठणगाव वनपरिक्षेत्रातील वडेगाव बंध्या परिसरात रानटी हत्तींच्या कळपाने मागील आठवडाभरापासून धुमाकूळ घातला आहे.परिसरातील मका पिकासह अन्य पिकाचे नुकसान केले.अश्यातच नुकतेच शेतात काम करीत असलेल्या शेतकऱ्यांवर जंगली हत्तींनी हल्ला केल्याने तीन शेतकरी जखमी झाले आहेत. जखमी झालेल्या शेतकऱ्यांमध्ये दयाराम घुगुसकर, आसाराम निमकर,उज्ज्वल चिंचेकर सर्व रा.वडेगाव बंध्या यांचा समावेश आहे.त्यांच्यावर केशोरी येथील प्राथमिक आरोग्य केंद्रात उपचार सुरू आहेत.

वडेगाव बंध्या येथील शेतकरी दोन दिवसांपूर्वी सकाळी नेहमी प्रमाणे शेतात गेले होते.शेतशिवारात हत्तींचा कळप असल्याची त्यांना कसलीच कल्पना नव्हती. दरम्यान,शेतात काम करीत असतांना अचानक हत्तींचा कळप शेतकऱ्यांवर धावून गेला आणि शेतकऱ्यांना पाठीमागून धक्का दिला.यात तिन्ही शेतकरी जखमी झाले.यावेळी जखमी अवस्थेतच शेतकऱ्यांनी पळ काढला व आपले प्राण वाचविले. घटनेची माहिती त्यांनी गावात दिली.तिन्ही जखमी शेतकऱ्यांना केशोरी येथील प्राथमिक आरोग्य केंद्रात उपचारासाठी दाखल करण्यात आले असून त्यांच्यावर उपचार सुरू आहेत.घटनेने परिसरातील शेतकरी धास्तावले असून जंगली हत्तींचा तात्काळ बंदोबस्त करावा,अशी मागणी गावकऱ्यांनी केली आहे.