वर्गमित्राकडून शारीरीक,मानसिक त्रास; इमारतीच्या १५ व्या मजल्यावरून उडी घेत आत्महत्या.. – व्हॉईस मॅसेज व रेकॉर्डिंगवरून उलगडा..

पुणे :-अभियांत्रिकीच्या तिसऱ्या वर्षात शिक्षण घेणाऱ्या एका २० वर्षीय तरुणीने वर्गमित्राकडून होणाऱ्या जाचाला कंटाळून इमारतीच्या १५ व्या मजल्यावरून उडी मारून आत्महत्या केल्याची घटना पुण्यातील ताथवडे येठे उघडकीस आली आहे. प्रकरणी सुरुवातीला पोलिसांनी अकस्मात मृत्यूची नोंद केली; मात्र, विद्यार्थिनीने व्हॉईस मॅसेज व रेकॉर्डिंगवरून आत्महत्येस प्रवृत्त केल्याचा उलगडा होताच एका विद्यार्थ्याला अटक करण्यात आली आहे.सहिती कलुगोटाला रेड्डी वय २० वर्षे असे आत्महत्या केलेल्या विद्यार्थिनीचे नाव आहे.तर प्रणव राजेंद्र डोंगरे वय २० वर्षे असे आरोपी विद्यार्थ्याचे नाव आहे.

सहिती रेड्डी ही आकुर्डी येथील एका महाविद्यालयात अभियांत्रिकीच्या तिसऱ्या वर्षाची विद्यार्थिनी होती.तिने १५ व्या मजल्यावरून उडी मारून आत्महत्या केल्याने पोलिसांनी सुरुवातीला अकस्मात मृत्यूची नोंद केली.पण तिने आत्महत्येपूर्वी आपल्या मोबाईलमध्ये अनेक व्हॉईस मॅसेज व रेकॉर्डिंग करून ठेवले होते.हे मॅसेज व रेकॉर्डिंगचे पुरावे तिने आपल्या काही मित्रांना फॉरवर्ड करत आपला मोबाईल कुठे ठेवला आहे,त्याचे ठिकाण व त्याचा पासवर्डही सांगितला होता.तिच्या मित्र-मैत्रिणींनी हा सर्व प्रकार तिच्या पालकांना सांगितला.प्रकरणी सहितीचे वडील कलुगोटाला वेंकटा सीवा रेड्डी वय ५४ वर्षे यांनी वाकड पोलिसांत फिर्याद दिली.त्यानंतर पोलिसांनी हा मोबाईल हस्तगत केला असता सहितीच्या आत्महत्येचे खरे कारण समोर आले.आरोपी प्रणव डोंगरे हा सहितीस शारीरीक व मानसिक त्रास देत होता,असे सहितीने आपल्या रेकॉर्डिंगमध्ये म्हटले होते.