अखेर काँग्रेसच्या नव्या प्रदेशाध्यक्ष पदाची हर्षवर्धन सपकाळांनी सूत्रे घेतली हाती..

मुंबई :-बुलढाण्याचे माजी आमदार हर्षवर्धन सपकाळ यांची नुकतीच १३ फेब्रुवारीला काँग्रेसचे महाराष्ट्राचे नवे प्रदेशाध्यक्ष म्हणून नियुक्ती करण्यात आली. काँग्रेसकडून अधिकृतपणे प्रसिद्धीपत्रक जारी करुन याबाबत माहिती देण्यात आली होती.तत्पूर्वी काँग्रेस नेते नाना पटोले हे महाराष्ट्र काँग्रेसचे प्रदेशाध्यक्ष म्हणून कार्यरत होते.काँग्रेसचे राष्ट्रीय अध्यक्ष मल्लिकार्जुन खर्गे यांनी हर्षवर्धन सपकाळ यांची महाराष्ट्र काँग्रेसचे प्रदेशाध्यक्ष म्हणून नियुक्ती केल्याचे संबंधित पत्रकात म्हटले होते. त्यानुसार महाराष्ट्र प्रदेश काँग्रेस कमिटीचे नवीन प्रदेशाध्यक्ष हर्षवर्धन सपकाळ यांनी आज,मंगळवार १८ फेब्रुवारीला मुंबईच्या टिळक भवन इथे काँग्रेस कमिटीच्या विविध नेते,पदाधिकारी तथा मान्यवरांच्या उपस्थितीत नव्या प्रदेशाध्यक्ष पदाची सूत्रे हाती घेतली आहेत.प्रसंगी काँग्रेसचे राज्य प्रभारी रमेश चेन्नीथला, ज्येष्ठ नेते मुकुल वासनिक,माजी प्रदेशाध्यक्ष नाना पटोले,विधी मंडळ पक्ष नेते विजय वडेट्टीवार,माजी प्रदेशाध्यक्ष माणिकराव ठाकरे उपस्थित होते. काँग्रेसमधील अनेक मोठ्या नेत्यांची नावे चर्चेत असतांना पक्षाच्या वरिष्ठ नेत्यांनी हर्षवर्धन सपकाळ यांना प्रदेशाध्यक्ष पदाची जबाबदारी दिली आहे.

हर्षवर्धन सपकाळ हे काँग्रेसचे निष्ठावान नेते आहेत. त्यांच्यावर पक्षाने मोठी जबाबदारी सोपवली आहे. हर्षवर्धन सपकाळ हे २०१४ ते २०१९ या काळात बुलढाणा मतदारसंघाचे आमदार होते.तसेच ते बुलढाणा जिल्हा परिषदेचे माजी अध्यक्ष आहेत. हर्षवर्धन सपकाळ हे राजीव गांधी पंचायत राज संघटनेचे राष्ट्रीय अध्यक्ष आहेत.ते काँग्रेसच्या राष्ट्रीय आणि राज्य स्तरावरील विविध कार्यक्रमांमध्ये सहभागी होत असतात.याशिवाय सपकाळ हे गांधी परिवाराचे जवळचे मानले जातात.त्यांनी संत गाडगेबाबा अमरावती विद्यापीठातून बी.कॉम व बी.पी.एड पदवी धारण केलेली आहे.