पावसाळी अधिवेशनाची सांगता; ३० विधेयके पारित.. -आगामी हिवाळी अधिवेशन नागपुरात..

मुंबई :-सोमवार २२ जून २०२६ रोजी सुरू झालेल्या महाराष्ट्र राज्य विधिमंडळाच्या पावसाळी अधिवेशनाची आज,शुक्रवार १० जुलै रोजी सांगता झाली.तब्बल १४ दिवस चाललेल्या अधिवेशन सत्रात अनेक महत्त्वाच्या लोककल्याणकारी विषयांवर सखोल चर्चा झाली. अधिवेशनाच्या आज शेवटच्या दिवशी विधानसभा अध्यक्ष राहुल नार्वेकर आणि विधान परिषद सभापती राम शिंदे यांनी दोन्ही सभागृहांच्या प्रत्यक्ष कामकाजाची सांख्यिकीय माहिती पटलावर ठेवली.त्यानुसार,आगामी हिवाळी अधिवेशन ७ डिसेंबर २०२६ रोजी नागपुरात होणार आहे.विशेषतः विधानसभेत १४ दिवसांत एकूण १२७ तास ५४ मिनिटे प्रत्यक्ष कामकाज झाले.त्याची रोजची सरासरी ९ तास ८ मिनिटे इतकी होती.या सत्रात मंत्री उपस्थित नसल्यामुळे २५ मिनिटांचा,तर इतर कारणांमुळे ५ मिनिटांचा वेळ वाया गेला.विधानसभेत एकूण २२ शासकीय विधेयके पुनरःस्थापित करण्यात आली,त्यापैकी २१ विधेयके संमत करण्यात आली,तर १ विधेयक संयुक्त समितीकडे पाठवण्यात आले. अशासकीय १२ विधेयके चर्चेअंती मागे घेण्यात आली.तर दुसरीकडे,विधान परिषदेतही १४ दिवसांमध्ये १०१ तास १० मिनिटे प्रत्यक्ष कामकाज झाले आणि रोजची सरासरी ७ तास १३ मिनिटे राहिली.मंत्र्यांच्या अनुपस्थितीमुळे ३५ मिनिटे,तर इतर कारणांमुळे ४० मिनिटे वाया गेली.विधान परिषदेत पुनरःस्थापित करण्यात आलेली सर्व ९ शासकीय विधेयके संमत करण्यात आली.तसेच विधानसभेतून मंजूर होऊन आलेली १८ विधेयकेही येथे पारित करण्यात आली आणि १ विधेयक संयुक्त समितीकडे पाठवण्यात आले.