मित्राला सोडून देण्यासाठी देसाईगंजला गेलेल्या ब्रम्हपुरीच्या तरुणाची वैनगंगा नदीत उडी…

चंद्रपूर :-जिल्ह्याच्या ब्रम्हपुरी शहरात वास्तव्यास असणारा २२ वर्षीय तरुण मित्राला सोडून देण्यासाठी दुचाकीने देसाईगंजला(वडसा)गेला.मात्र,परतीच्या वाटेवर असणाऱ्या देसाईगंज-ब्रम्हपुरी मार्गावरील वैनगंगा नदीत उडी घेऊन जीवनयात्रा संपविली असल्याची घटना रविवारी २० एप्रिल रोजी रात्रीच्या सुमारास घडली असून काल,सोमवार २१ एप्रिलला तरुणाचे मृतदेह बाहेर काढण्यात ब्रम्हपुरी पोलिसांना यश आले आहे.कौशीक रंगराव खोब्रागडे,रा.ता. ब्रम्हपुरी,जि.चंद्रपूर असे आत्महत्या केलेल्या तरुणाचे नाव असून त्याचे वडील रंगराव खोब्रागडे हे ब्रम्हपुरी पोलिस ठाण्यात हवालदार म्हणून कार्यरत आहेत.

याबाबत अधिक माहिती अशी की,कौशीकने यापूर्वीही दोनदा आत्महत्येचा प्रयत्न केला होता.घटनेच्या दिवशी रविवारी तो सायंकाळच्या सुमारास ब्रम्हपुरीहून सायंकाळी पाचच्या दरम्यान,मित्राला सोडून देण्यासाठी देसाईगंजला गेला होता.मात्र,बराच उशीर होऊनही कौशिक घरी न आल्याने कुटुंबीयांनी चिंता व्यक्त केली व सोबत गेलेल्या मित्राला संपर्क साधून विचारणा केली असता,तो केव्हाचाच गेला असल्याची माहिती दिली.त्यानुसार कुटुंबीयांनी सर्वत्र शोध घेऊनही त्याचा थांगपत्ता लागलेला नव्हता.अशातच काही नागरिकांनी हरदोली नदिघाटावरून कुणीतरी नदीत उडी घेतल्याची माहिती दिली.त्यानुसार याबाबत ब्रम्हपुरी पोलीस प्रशासनास माहिती देण्यात आली.काल सोमवारी पोलिसांनी नदी परिसरात शोधाशोध केली असता,मृतदेह सापडला.मृतदेह पाहून आईने एकच टाहो फोडला. कौशिकने आत्महत्येसारखे टोकाचे पाऊल कां उचलले? हे अद्यापही गुलदस्त्यात आहे.घटनेचा पुढील तपास ब्रम्हपुरी पोलीस प्रशासन करीत आहेत.