वाढदिवसाचा कार्यक्रम असल्याचा बनाव; बालविवाहात सरकारी पाहुण्यांची एंट्री..

नागपूर :-एका १६ वर्षीय अल्पवयीन मुलीचा बालविवाह २० वर्षीय तरुणासोबत लावल्या जात असल्याची माहिती नागपूर जिल्हा बालसंरक्षण कक्षाला प्राप्त होताच पथकाने अल्पवयीन मुलीची बालविवाहाच्या जोखडातून सुरक्षितरित्या सुटका केल्याची घटना नागपूर जिल्ह्याच्या रामटेक तालुक्यात उघडकीस आली.पथकाने संबंधित गावात जाऊन विवाह रोखण्याचा प्रयत्न केला असता नातेवाइकांनी ‘फक्त वाढदिवसाचा कार्यक्रम आहे,’ असा बनाव  केला.मात्र,सखोल पडताळणीत घरात हळदीचा कार्यक्रम सुरू असल्याचे उघड झाले.स्वतः पीडित मुलीनेही नातेवाइकांच्या दबावामुळे हा विवाह होत असल्याचे जबाबात सांगितल्याने पोलिसांनी मुलीला सुरक्षित रेस्क्यू करून पुढील संरक्षण व समुपदेशनासाठी बालगृहात दाखल केले.विशेष म्हणजे,बाल संरक्षण समितीकडून कारवाई सुरू असतांना,गावातील एका स्वयंघोषित समाजसेविकेने यात अडथळा आणण्याचा प्रयत्न केला.घटनेचे गांभीर्य ओळखून जिल्हा बालसंरक्षण अधिकारी मुस्ताक पठाण यांनी तात्काळ रामटेकचे तहसीलदार रमेश कोडापे यांच्याशी संपर्क साधून शासकीय यंत्रणा मिळवली व पुढील प्रक्रिया पार पाडली.सदरची कारवाई जिल्हा बालसंरक्षण अधिकारी मुस्ताक पठाण,प्रसेनजित गायकवाड,साधना ठोंबरे, अनिकेत भिवगडे,मीनाक्षी धडाडे,प्रियंका होटे,पोलीस उपनिरीक्षक वर्षा गायकवाड,सरपंच वर्षा हट्टी,ग्राम अधिकारी करुणा महाले,पोलिस पाटील वैशाली सलामे व अंगणवाडी सेविका विजया कश्यप यांनी केली.