पायाला चिखल माखल्याने धुण्यासाठी मोठ्या नहराजवळ गेले अन् विपरीत घडले; पती-पत्नीचा मृत्यू..

भंडारा :-शेत पाहण्यासाठी शेतीवर गेले असता पायाला चिखल माखल्याने पाय धुण्यासाठी गोसेखुर्दच्या उजव्या कालव्याजवळ(मोठा नहर)गेले असता पत्नीचा पाय घसरला आणि ती पाण्यात पडली.पत्नीला वाचविण्यासाठी पतीनेही पाण्यात उडी मारली,मात्र पाण्याच्या प्रवाहात दोघेही वाहून जात दोघांचाही करून अंत झाल्याची घटना काल,रविवार ११ ऑक्टोंबर रोजी सायंकाळच्या सुमारास भंडारा जिल्ह्याच्या पवनी तालुक्यातील कोरंभी गाव नजीकच्या शेत शिवारात घडली.स्वप्नील अशोक बनकर वय २९ वर्षे व पत्नी प्रज्ञा बनकर वय २५ वर्षे रा.कोरंभी असे मृत पावलेल्या पती-पत्नीचे नाव आहे.

दोघेही पती-पत्नी कामासाठी नागपूर येथे राहत होते.ते दोन दिवसांपूर्वी काही कामानिमित्ताने पवनी तालुक्यातील कोरंभी येथे स्वगावी परतले होते.रविवारी दोघेही पती-पत्नी शेत पाहण्यासाठी शेतीवर गेले असता पायाला चिखल लागल्याने गोसेखुर्दच्या उजव्या कालव्यात पाय धुण्यासाठी उतरत असतांनाच पत्नीचा पाय घसरला.पत्नी पाण्याच्या प्रवाहात वाहून जात असतांनाच पतीने पाण्यात उडी घेतली.मात्र,पाण्याचा मोठा प्रवाह असल्याने दोघेही वाहून गेले.दरम्यान, दोघांचेही प्रेत वाहून जातांना काहींना दिसले.घटनेची माहिती मिळताच पवनी पोलिसांनी घटनास्थळी धाव घेतली.दोघांचा शोध घेण्यासाठी गोताखोरांची मदत घेण्यात आली.मात्र,पाण्याची खोली,प्रवाहाचा वेग आणि रात्रीच्या अंधारामुळे बचावकार्य थांबविण्यात आले.परत आज शोधमोहीम राबविण्यात येणार आहे.या प्रकरणी पवनी पोलिसांकडून पुढील तपास सुरू आहे.