उद्रेक न्युज वृत्त
चंद्रपूर :- महावितरण घुग्घुस कार्यालयांतर्गत नकोडा येथील वीज कर्मचाऱ्याला कर्तव्यावर असताना वीजखांबाला दुपट्टयाने बांधून शिवीगाळ करणारे नकोडाचे सरपंच किरण बांदुरकर यांच्याविरुद्ध पोलिसांनी गुन्हा दाखल केला.मात्र,१० दिवसांपासून फरार असल्याने पोलिसांच्या कार्यशैलीवर प्रश्नचिन्ह निर्माण झाले.आरोपी सरपंच भाजपचे समर्थक आहेत; हे विशेष.
१५ जून २०२४ रोजी वीज कर्मचारी सूरज परचाके हे कर्तव्यावरून उसगावकडे येत होते.दरम्यान,नकोडाचे सरपंच किरण बांदुरकर व अन्य दोन इसमांनी अडवून परचाके यांना नकोडा गावात आणले.त्यांच्याच दुपट्टयाने वीजखांबाला बांधून शिवीगाळ केली.वीज कर्मचाऱ्याच्या तक्रारीवरून पोलिसांनी सरपंच बांदुरकरविरुद्ध गुन्हा दाखल केला.मात्र,अटकेपूर्वीच फरार झाले.फरार सरपंचाला अटक करण्याच्या मागणीसाठी वीज कर्मचाऱ्यांनी कामबंद आंदोलन सुरू केले.
दरम्यान,कर्मचाऱ्यांनी आरोपीला अटक केल्याशिवाय कर्तव्यावर रूजू होणार नाही; असा इशारा दिला होता. हे आंदोलन आणखी काही दिवस सुरूच राहील अशी स्थिती निर्माण झाली होती.पोलिस अधीक्षकांनी सरपंचाला अटक करू, असे आश्वासन दिल्यानंतर आंदोलन मागे घेतले. मात्र, घटनेला १० दिवस होऊनही पोलिसांना आरोपीपर्यंत पोहोचता आले नाही. त्यामुळे पोलिसांच्या कर्तव्यावर प्रश्नचिन्ह निर्माण झाले आहे.
