चालकाचे व्हॅनवरील नियंत्रण सुटून व्हॅन रस्त्याच्या खाली कोसळली; चालकासह विद्यार्थी जखमी..

भंडारा :-विद्यार्थ्यांना शाळेत घेऊन जाणाऱ्या स्कुलव्हॅनचा अपघात घडल्याची घटना आज,गुरुवार १६ ऑक्टोंबर रोजी दुपारच्या सुमारास भंडारा तालुक्यातील खमारी मार्गावरील सुरेवाडा पुलाजवळ घडली.सुदैवाने जीवितहानी टळली असली तरी अपघातात चालकासह विद्यार्थी जखमी झाले.२५ वर्षीय चालक उमेश मेश्राम रा.मांडवी,५ वर्षीय अवनेश भोयर रा.माटोरा,गर्ग मेश्राम रा.माटोरा,उर्वेश बेदरकर,सान्वी बेदरकर,रुद्रानी बेदरकर रा.मांडवी, सानिध्या चोपकर रा.खमारी अशी जखमिंची नावे असून घटना घडताच मार्गावरून जाणाऱ्या नागरिकांनी घटनास्थळी तात्काळ धाव घेत मदतकार्याला सुरुवात केली होती.घटनेची माहिती पोलिसांना मिळताच कारधा पोलिस ठाण्याचे पथक  घटनास्थळी दाखल झाले.त्यानंतर जगद्गुरु रामानंदाचार्य नरेंद्राचार्य मुख्यपीठाच्या रुग्णवाहिकेने जखमींना तातडीने जिल्हा सामान्य रुग्णालयात दाखल करण्यात आले.

स्कुलव्हॅन चालक उमेश मेश्राम हा नेहमी प्रमाणे आज गुरुवारी कारधा शाळेतील विद्यार्थ्यांना स्कुलव्हॅनमध्ये बसवून निघाला होता.प्रसंगी खमारी मार्गावरील सुरेवाडा पुलाजवळ येताच मार्गावर असलेल्या मोठमोठ्या खड्ड्यातून वाट काढतांना चालकाचे व्हॅनवरील नियंत्रण सुटले आणि व्हॅन रस्त्याच्या खाली जाऊन पलटली.अपघातात चालकासह विद्यार्थी जखमी झाले.मार्गावरून ये-जा करणाऱ्या नागरिकांनी तात्काळ घटनास्थळी धाव घेतल्याने मोठा अनर्थ टळला.