अखेर अल्पवयीन मुलीचे लैंगिक शोषण प्रकरणी शिक्षकास अटक… – मुंबईला पळून जाण्याच्या तयारीत असतांना अकोल्यातून अटक…

चंद्रपूर :-एका शाळेतील मुलीला अतिरिक्त शिकवणीच्या नावाखाली बोलावून तिच्यावर लैंगिक अत्याचार केल्याप्रकरणी शिक्षक अमोल विनायक लोडे वय २८ वर्षे,रा.ता.कोरपना,जि.चंद्रपूर,याला स्थानिक गुन्हे शाखेच्या पथकाने मुंबई येथे पळून जाण्याच्या तयारीत असताना अकोला येथील बसस्थानकावरून अटक केली आहे.अमोल लोडे हा कोरपना येथील युवक काँग्रेसचा शहर अध्यक्ष आहे.एका खासगी शाळेत पीडित विद्यार्थिनी सहावीत शिक्षण घेत होती उन्हाळ्याच्या सुटीत अतिरिक्त वर्ग भरविण्यात येत होते.ती मुलगीसुद्धा शिकवणीसाठी जात होती. दरम्यान,आरोपी शिक्षक अमोल लोडे याने तिचे लैंगिक शोषण केले तसेच ही बाब घरच्यांना सांगितल्यास आई-वडिलांना जीवे मारण्याची धमकी दिली होती. त्यामुळे त्या पीडित मुलीने ही बाब कुणालाही सांगितली नव्हती.मात्र,घरच्यांना माहिती होताच त्यांनी मुलीची विचारपूस करून ठाण्यात धाव घेतली.पीडितेच्या तक्रारीवरून पोलिसांनी शिक्षक अमोल लोडे याच्यावर कलम ३७६ पोस्कोअंतर्गत गुन्हा दाखल केला.मात्र, शिक्षक फरार होता.दरम्यान, स्थानिक गुन्हे शाखेच्या पथकाने तपासाची चक्रे फिरवून आरोपी शिक्षक अमोल लोडे मुंबईला पळून जाण्याच्या तयारीत असताना अकोला येथील बसस्थानकावरून अटक केली. ही कारवाई पोलिस अधीक्षक मुम्मका सुदर्शन,अप्पर पोलिस अधीक्षक रिना जनबंधू यांच्या मार्गदर्शनात एलसीबीचे पोलिस निरीक्षक महेश कोंडावार यांच्या नेतृत्त्वात सहाय्यक पोलिस निरीक्षक बलराम झाडोकार,पोलीस उपनिरीक्षक विनोद भुरले, पोउनि.मधुकर सामलवार,धनराज करकाडे,नितेश महात्मे आदींनी केली.अल्पवयीन मुलीचे लैंगिक शोषण झाल्याची बातमी गावकऱ्यांना कळताच संताप व्यक्त करीत या घटनेचा निषेध म्हणून काल,बुधवारी कोरपना येथे निषेध रॅली काढण्यात आली.या रॅलीत मोठ्या संख्येने नागरिकांनी सहभाग घेतला होता. तसेच कोरपना येथील बाजारपेठेत कडकडीत बंद पाळण्यात आला.गुरुवारी या घटनेच्या निषेधार्थ कोरपना शहरात सर्वपक्षीय निषेध मोर्चा काढण्यात येणार आहे.