बांधकाम कामगार योजनांचा लाभ घेण्यासाठी ९० दिवस काम केल्याचे बनावट प्रमाणपत्र; ११ जणांवर गुन्हे दाखल..

नागपूर :-कंत्राटदार,ऑनलाइन सेवा केंद्र संचालक व एजंट यांच्या संगनमताने करण्यात आलेल्या बोगस कामगार नोंदणीचे रॅकेट उघडकीस येताच तब्बल ११ जणांवर गुन्हे दाखल करण्यात आले आहे.९० दिवस काम केल्याचे बनावट प्रमाणपत्र सादर करून सरकारची दिशाभूल करीत योजनेचा लाभ घेतल्याचे उघड होताच अधिकाऱ्यांनी कुही पोलिस ठाण्यात तक्रार नोंदविली.या प्रकरणाचे धागेदोरे कुही तालुक्यासह उमरेड व भिवापूर तालुक्यांपर्यंत पोहोचले आहेत.त्यानंतर उमरेड पोलिस ठाण्यात भारतीय न्यायसंहिता(बीएनएस)कलम ३१८(४) व ३३६ (३)अन्वये गुन्हा दाखल करण्यात आला.या प्रकरणात आधी झेरॉक्स दुकानदार अंकुश चिंतामण भुजबळ वय ३२ वर्षे,रा. बेसूर,ता.भिवापूर,जि.नागपूर, बोगस प्रमाणपत्र घेणारे हरेश शामराव दमके वय ५८ वर्षे,रा.बाम्हणी,ता.उमरेड,जि.नागपूर, प्रफुल्ल किशोर पाल वय २८ वर्षे,रा.बुधवारी पेठ, उमरेड व एजंट गणेश ईश्वर मानकर वय ३५ वर्षे, रा.आपतूर,ता.कुही,जि.नागपूर या चौघांना आणि नंतर बोगस प्रमाणपत्र घेणारे परमेश्वर गोविंदा देशमुख वय ४३ वर्षे,रा.आपतूर,ता.कुही,भाऊराव रामचंद्र पडोळे वय ४६ वर्षे,रा.वेलतूर,ता.कुही,जि.नागपूर व एजंट गणेश ईश्वर मानकर वय ३० वर्षे,रा.आपतूर, ता.कुही या चौघांना अटक केली.या प्रकरणात सूरज निनावे,रा.भिवापूर व भिवापूर येथील निखिल झेरॉक्सचा मालक या दोघांवर नव्याने गुन्हे दाखल केल्याने पोलिस त्यांचा शोध घेत आहेत.या प्रकरणात आधी तिघांना अटक केल्याने अटकेतील आरोपींची संख्या ११ झाल्याने बोगस कामगार नोंदणीचे रॅकेट दूरवर पसरल्याची शक्यता व्यक्त करण्यात येत आहे.