सावधान..! घरकुलच्या नावाने फसवणूक करणाऱ्यांची टोळी सक्रिय.. – महिलेस घातला गंडा..

भंडारा :-राज्यात सध्या स्थितीत विविध घरकुल योजने अंतर्गत नागरिकांना मोठ्या प्रमाणावर घरकुले मंजूर करण्यात आली आहेत.त्यामुळे काही भामट्यांकडून वयोवृध्द तसेच निरक्षर लोकांचा फायदा घेत तुमच्या नावाने घरकुल आले आहे, त्यासाठी काही रक्कम द्यावी लागणार सांगून पैसे लुटण्याचा प्रकार नुकताच उघडकीस आला आहे.  जिल्हा परिषद मधील अधिकारी असल्याचे सांगून भामट्याने फसवणूक केल्याचे लक्षात येताच महिलेने आपबिती सांगितल्याने सदर प्रकरण उजेडात आले आहे.

भंडारा जिल्ह्यात घरकुल यादी प्रसिद्ध होऊन बऱ्याच ठिकाणी कामाला प्रारंभ झाला आहे.याचाच फायदा घेत पवनी तालुक्याच्या कातुर्ली येथे एका भामट्याने गावात प्रवेश केला.जिल्हा परिषदमधील अधिकारी आहे,असे सांगून गावातीलच एका महिलेला घरकुल आल्याचे बोलला.त्यासाठी सहा हजार रुपये रोख रक्कम द्यावी लागेल,अन्यथा तुमचे घरकुल परत जाईल असे सांगितले.महिलेने आमिषाला बळी पडत घरात असलेले सहा हजार रुपये त्या भामट्याला दिले. घडलेला हा प्रकार काल रविवारला महिलेच्या लक्षात आला.गावात कुठल्याही प्रकारची मुनादी व सूचना नसतांना घरकुलाचा मुद्यावर कुणी कसे पैसे मागू शकतो यावरही आश्चर्य व्यक्त करण्यात येत आहे. कोण,कुठल्या प्रकारे फसवणूक करेल,हे सांगताच येत नाही.त्यामुळे नागरिकांनी सतर्कता बाळगलेली बरी.