सकाळी पंचायत समितीत शॉर्टसर्किटमुळे भीषण आग; महत्त्वाचे साहित्य जळून खाक.. – सुट्टी असल्याने जीवितहानी टळली..

भंडारा :-जिल्ह्याच्या तुमसर पंचायत समितीत आज,शनिवार २६ एप्रिलला सकाळी साडे सातच्या  दरम्यान शॉर्टसर्किटमुळे भीषण आग लागल्याने दस्तऐवज असलेल्या खोलीतील दस्तऐवज,संगणकीय उपकरणे, पंखे आणि इतर महत्त्वाचे साहित्य जळून खाक झाले.मात्र,आज कार्यालयाला शासकीय सुट्टी असल्याने जीवितहानी टळली.अशातच आगीच्या धुराने संपूर्ण इमारत अंधकारमय झाले होते.घटनेची माहिती कळताच स्थानिक नागरिक,अधिकारी कर्मचाऱ्यांनी घटनास्थळी धाव घेत तात्काळ अग्निशमन दलाला पाचारण करण्यात आले. अग्निशमन दलाने जोर लावीत आगीवर नियंत्रण मिळवले.पण खोलीतील संपूर्ण साहित्य आगीत भस्मसात झाले होते.सदर दस्तऐवज खोली पंचायत समितीच्या नवीन इमारतीत असून,या खोलीत १०६५ पासूनचे सर्व महत्त्वाचे कागदपत्र,विविध प्रकरणांचे रेकॉर्ड्स,प्रशासकीय फाईली सांभाळून ठेवण्यात आले होते.कर्मचाऱ्याच्या माहितीनुसार,खोलीत दरवाजे आणि खिडक्या पूर्ण बंद असतानाही पंखे सुरू होते. पंख्यांच्या वायरिंगमध्ये शॉर्टसर्किट झाल्याने ही आग लागल्याची प्राथमिक शक्यता व्यक्त करण्यात येत आहे.अशातच सदरची लागलेली आग शॉर्टसर्किटमुळे की अन्य कोणत्या कारणाने लागलीय,अश्या चर्चांना उधाण आले आहे.कारण काही भ्रष्ट अधिकारी,पदाधिकाऱ्यांच्या संदर्भातील चौकशीचे दस्तऐवज आगीत भस्मसात झाल्याने सदरची आग पूर्वनियोजित होती की काय?सदर घटनेची सखोल चौकशी करण्यात यावी,अशी मागणी नागरिकांकडून केली जात आहे.