शाळेत जाण्याचे स्वप्न भंगले; दहावीच्या विद्यार्थिनीचा अपघातात मृत्यू..

भंडारा :-जिल्ह्याच्या तुमसर तालुक्यात हृदयाला चटका लावणारी घटना काल सोमवारी सकाळच्या सुमारास घडली.सकाळच्या सुमारास मैत्रिणींसह शाळेत जाण्यासाठी निघालेल्या विद्यार्थिनीची वाटेत असणाऱ्या रस्त्यावरील चिखलामुळे सायकल स्लीप झाली. तितक्यात समोरून ट्रॅक्टर आला आणि ट्रॅक्टरच्या मागचा लोखंडी भाग विद्यार्थिनीच्या डोक्याला लागल्याने ती रक्तबंबाळ अवस्थेत खाली कोसळली आणि जागीच गतप्राण झाली.मैत्रिणीच्या किंकाळ्यांनी परिसरात एकच खळबळ उडाली. अपघातात सिमरन श्याम ठवकर वय १५ वर्षे रा.बाम्हणी,ता.तुमसर असे जागीच मृत पावलेल्या विद्यार्थिनीचे नाव असून ती तुमसरच्या जनता विद्यालयाची इयत्ता दहावीची विद्यार्थिनी होती. अपघातानंतर ट्रॅक्टरचालक घटनास्थळावरून पसार झाला होता.मात्र,पोलिसांनी काही तासांत ट्रॅक्टर जप्त करून चालक सुनील योगीलाल पटले वय ३८ वर्षे,रा.हसारा याला अटक केली आहे.

सिमरन सकाळी बाम्हणी येथून चार मैत्रिणींसोबत सायकलवरून शाळेत जाण्यासाठी निघाली होती. थोड्या अंतरावर गेली असतांना बाम्हणी-कोष्टी शिवारातील वळणावर एका घराजवळ रस्त्याशेजारी चिखल साचला आहे.त्या चिखलातून सिमरनची सायकल स्लीप झाली आणि एमएच ३६ एल ६१९ क्रमांकाच्या ट्रॅक्टरचा मागील लोखंडी भाग लागल्याने शाळेत जाण्याचे स्वप्न भंगले.गरिबीतही शिक्षणाची गोडी मनात जपणारी आणि नियमित वेळेवर शाळेत जाणाऱ्या सिमरनच्या आयुष्याचा खेळ अपघाताने संपवला.