बापरे..! तब्बल १९९ किलो गाजांची वाहतूक; दोघेजण अटकेत..

साकोली पोलिसांना आज,सोमवार २७ जुलैच्या पहाटे ओडिशा राज्यातून गांजाने भरलेला टाटा कंपनीचा डब्लूबी २३ एफ ८७८५ क्रमांकाचा ट्रक रायपूर-राजनांदगाव-देवरी-साकोली या राष्ट्रीय महामार्गे नागपूरकडे जात असल्याची गोपनीय माहिती मिळाली होती.या माहितीच्या आधारे,वरिष्ठ अधिकाऱ्यांच्या मार्गदर्शनाखाली साकोली तालुक्यातील सेंदूरवाफा टोलनाक्यावर पहाटे सापळा रचण्यात आला.पहाटे सुमारे दोन ते तीन वाजताच्या दरम्यान संशयित ट्रक अडवून त्याची पंचांसमक्ष तपासणी करण्यात आली.तपासणी दरम्यान ट्रकमध्ये लपवून ठेवलेला १९९.५६० किलो गांजा आढळून आला.जप्त केलेल्या गांजाची किंमत ९९ लाख ७८ हजार इतकी असून ट्रकची किंमत ३५ लाख अशा प्रकारे एकूण १ कोटी ३४ लाख ७८ हजारांचा मुद्देमाल जप्त करण्यात आला.विशेष म्हणजे,यापूर्वीही साकोली पोलिसांनी मुंबई नार्कोटिक्स विभागाच्या सहकार्याने सेंदूरवाफा टोलनाक्यावर मोठी कारवाई करून तब्बल २४५ किलो गांजा जप्त केला होता. त्याहीवेळेस ओडिशाहून नागपूरकडे निघालेल्या आयशर ट्रकमधील कॅरेटच्या खाली ठेवलेला अंमली पदार्थ पोलिसांनी शोधून काढला होता.त्याही प्रकरणात चालक व क्लीनरला ताब्यात घेण्यात आले होते.आज करण्यात आलेली कारवाई भंडारा जिल्हा पोलीस अधीक्षक नुरुल हसन,अप्पर पोलीस अधीक्षक निलेश मोरे, उपविभागीय पोलीस अधिकारी शिवम विसापुरे आणि साकोली पोलीस ठाण्याचे ठाणेदार महादेव आचरेकर यांच्या मार्गदर्शनाखाली साकोली पोलीस ठाण्याचे एपीआय जितेंद्र राऊत,पीएसआय किशोर मानकर, अर्जुन बेडवाल,स्वप्नील गोस्वामी,नरेंद्र झलके,सचिन राऊत, टेकचंद बुरडे,गोविंद शिंदे,धनविजय गणवीर यांच्या पथकाने केली.