दुचाकी अपघातात एकाचा मृत्यू तर दोघे गंभीर जखमी.. – कुरखेडाच्या गेवर्धा मार्गावरील घटना..

कुरखेडा(गडचिरोली):-कुरखेडा तालुक्याच्या गेवर्धा मार्गावरील को-ऑपरेटिव्ह बँकेच्या समोर दोन दुचाकी वाहनांची समोरासमोर धडक होऊन एका दुचाकी चालकाचा रुग्णालयात उपचारादरम्यान मृत्यू झाला, तर दुसऱ्या दुचाकीवरील दोघेजण गंभीर जखमी झाल्याने त्यांना गडचिरोली जिल्हा सामान्य रुग्णालयात पुढील उपचाराकरिता हलविण्यात आले आहे.सदरची घटना आज,बुधवार १७ सप्टेंबर रोजी सकाळी पावणे बाराच्या सुमारास घडली.चरणदास गोमा उसेंडी वय ५८ वर्षे रा.भगवानपूर,ता.कुरखेडा, जि.गडचिरोली असे अपघातात मृत पावलेल्या व्यक्तीचे नाव आहे.तर १८ वर्षीय प्रीतम ईश्वर नैताम रा.कोसी,ता.कुरखेडा व जनाबाई नैताम वय ६९ वर्षे,रा.रावणवाडी असे गंभीर जखमी दोघांची नावे आहेत.

माहितीनुसार,प्रीतम व जनाबाई हे दुचाकीने गुरनोली-अरततोंडीकडे जाण्यासाठी निघाले होते.तर एमएच ३३ डी ९३०१ क्रमांकाच्या दुचाकीने चरणदास उसेंडी हे कुरखेडा वरून गेवर्धामार्गे येत असतांनाच मुख्य मार्गाच्या बाजूला असलेल्या को-ऑपरेटिव्ह बँकेच्या समोर दोन्ही दुचाकींची समोरासमोर धडक बसली. यात तिघेही खाली कोसळले.धडक भीषण असल्याने तिघांनाही जोरदार मार लागला.लागलीच नागरिकांनी घटनास्थळी धाव घेत तिघांनाही तात्काळ कुरखेडा उपजिल्हा रुग्णालयात उपचारार्थ दाखल केले.उपचार सुरू असतांनाच चरणदास उसेंडी यांचा मृत्यू झाला.तर गंभीर जखमी दोघांना गडचिरोली रेफर करण्यात आले.घटनेची माहिती कुरखेडा पोलिसांना मिळताच त्यांनी रुग्णालयात धाव घेत पुढील तपास सुरू केला आहे.