उद्रेक न्युज वृत्त
आरमोरी :- गोदामातून चोरी केलेले धान त्यांनी शेतकऱ्यांचे आहे; असे सांगून लोहारा येथील एका व्यापाऱ्याला विकले. व्यापाऱ्याकडून पैसे घेऊन दारू,सिगारेट, हॉटेलमध्ये जेवणावर ते उडवत होते.चोरीतून पैसा येत असल्याने कमी वेळात पैसे कमविण्यासाठी त्यांना चोरीचा मार्ग अधिक सुकर वाटू लागला.पालकांना मुले काय करीत आहेत.रात्री कुठे जात होती,याची कल्पनाही नव्हती.
रात्रीच्या वेळेस गोदामात दुसऱ्या चोरांना धानाची चोरी करताना बघून अल्पवयीन मुले चोरीकडे वळली व त्यांनी आपल्या मित्रांना यात सहभागी करून एकाच गोदामातून त्यांनी धानाची चोरी केली. तिनदा धानाची चोरी करण्याचा प्रयत्न यशस्वी झाल्यावर पुन्हा चौथ्यांदा चोरी करण्यासाठी त्याच गोदामात गेले.मात्र,चौथ्यांदा चोरी करताना डाव फसला आणि ते शेतकऱ्याचा जाळ्यात अडकले गेले.
आरमोरी तालुक्यातील डोंगरगाव येथे प्रवीण पटेल यांचे गावाबाहेर डोंगरी परिसरात गोदाम आहे.सदर गोदाम रिकामे राहत असल्याने गेल्या चार पाच वर्षांपासून गावांतील काही शेतकरी गोदामात धानाची साठवणूक करायला लागले.गोदामातून अल्पवयीन मुलासाह आरोपींनी तिनदा धानाची चोरी केली होती. २७ मे रोजी गावांतील काही शेतकरी जेव्हा उन्हाळी धान ठेवण्यासाठी गोदामात गेले असता त्यांना तेथे दुसरा कुलूप लावलेला दिसला.त्यामुळे त्यांनी कुलूप तोडून गोदामात बघितले असता धानाची चोरी झाल्याचे लक्षात आले.चोर पुन्हा चोरी करण्यासाठी येतील म्हणून काही शेतकऱ्यांनी गोदाम परिसरात पाळत ठेवली होती.२९ मे रोजी रात्री गोदामात ठेवलेल्या धानाची चोरी करण्यासाठी जेव्हा दोन अल्पवयीन मुले व एक १९ वर्षीय आरोपी गेले तेव्हा गावातील शेतकऱ्यांनी रंगेहाथ पकडून पोलिसांच्या स्वाधीन केले.
आरोपी रोहन हरिदास सयाम वय १९ वर्षे रा. देऊळगाव याला चोरी प्रकरणातील अल्पवयीन मुलांनी फूस लावून फिरायच्या बहाण्याने चौथ्या चोरीसाठी नेले होते.तर वृषभ श्यामराव मेश्राम वय २१ वर्षे रा.आरमोरी हा दुसऱ्या व तिसऱ्या चोरीत सहभागी झाल्याने पोलिस तपासात तोही आरोपी ठरला.दोन्ही अल्पवयीन मुले व दोन सज्ञान आरोपी हे शाळा महाविद्यालयात शिक्षण घेत आहेत. सगळ्यांच्या घरची आर्थिक परिस्थिती गरिबीची आहे. आई-वडील मोलमजुरी करणारे आहेत.चोरी प्रकरणात पकडला गेलेला एक अल्पवयीन मुलगा हा या प्रकरणातील मास्टर माइंड आहे.
