चिंधीचोरपणा..! ५०० रुपयाची लाच; आरटीओ सह दोन पंटर अडकले जाळ्यात…

गोंदिया :-हल्ली सगळीकडेच लाच घेण्याचे प्रमाण दिवसेंदिवस वाढतच चालले आहे.कोणी लाच स्वतः घेतो तर कोणी इतरांची नेमणूक करून ‘तो मी नव्हेच’ अशी भूमिका बजावतांना दिसून येतात.कोणी कितीही फंडे वापरले तरीही ‘ज्याचा घळा भरला तो सरला’असे म्हणणे चुकीचे ठरणार नाही.अशातच काहीजण चिंधीचोरपणा करीत असल्याचे दिसून येते.आपल्या पदाला शोभेल असे काहीतरी करावे,याचा अर्थ असा नाही की,तुम्ही गरिबांचे खिसे कापा अन् आपलेच पोट भरा.अशांना चाप बसविण्यासाठीच तर लाच लुचपत प्रतिबंधक विभाग(एसीबी)आहे.त्यातच आता मोठी बातमी समोर आली आहे.५०० रुपयाची लाच पंटरच्या हातांनी घेऊन ‘माल सुतावो’ अशी भूमिका बजावणाऱ्या मोटार वाहन निरीक्षकास(आरटीओ) व दोन पंटर यांस लाच लुचपत प्रतिबंधक विभागाने रंगेहाथ अटक केली आहे.योगेश गोविंद खैरनार वय ४६ वर्षे रा.रचना युथिका अपार्टमेंट,अमरावती रोड, नागपूर असे आरोपी मोटार वाहन निरीक्षकाचे तर नरेंद्र मोहनलाल गडपायले वय ६३ वर्षे रा.मरारटोली, गोंदिया व आश्लेश विनायक पाचपोर वय ४५ वर्षे रा. गव्हर्नमेंट पॉलीटेक्निक कॉलेज समोर,गाडगे नगर,अमरावती अशी आरोपींची नाव आहेत.

तक्रारदार यांच्या मालवाहतुकीचा ट्रेलर भंडारा-देवरी मार्गे रायपूर कडे जात असतांना आरटीओ सीमा तपासणी नाका,शिरपुर,देवरी येथे आरोपी नरेंद्र गडपायले याने एंट्रीच्या नावावर त्यांच्याकडे ५०० रुपयांची मागणी करून आरोपी आश्लेष पाचपोर याचे मार्फत आरोपी मोटार निरीक्ष खैरनार याचेकडे दिले.विशेष म्हणजे, पथकाकडून केलेल्या चौकशीत आरोपी नरेंद्र गडपायले व आश्लेष पाचपोर हे खासगी व्यक्ती असून आरोपी योगेश खैरनार यांनी दोघांनाही बेकायदेशीपणे शिरपूर,देवरी आरटीओ सीमा तपासणी नाका येथे नेमले असल्याचे व दोघांच्या मार्फत मुंबई-कोलकाता महामार्गाने जाणाऱ्या मालवाहू वाहन चालकांकडून एंट्रीच्या नावाखाली लाच स्वीकारत असल्याचे आढळून आले आहे.दरम्यान,पथकाने तिघांनाही ताब्यात घेत देवरी पोलीस ठाण्यात तिघांच्या विरोधात गुन्हा नोंद केला आहे.