आता एसटी कर्मचाऱ्यांचा दर महिन्याच्या ‘या’ तारखेला होणार पगार…

उद्रेक न्युज वृत्त :-एसटी मुख्यालयात महामंडळाच्या अध्यक्षपदाचा कार्यभार स्वीकारतांना परिवहन मंत्री तथा एसटी महामंडळाचे अध्यक्ष प्रताप सरनाईक यांनी आज,शुक्रवार ११ एप्रिलला यापुढे एसटी कर्मचाऱ्यांचा पगार हा दर महिन्याच्या ७ तारखेला होईल,याची जबाबदारी एसटी महामंडळाचे अध्यक्ष म्हणून माझी असेल,असे आश्वासन दिले आहे.आर्थिक अडचणींमुळे एसटीत काम करणाऱ्या ८३ हजार कर्मचाऱ्यांना मार्च महिन्याचे वेतन केवळ ५६ टक्के देता आले,हे अत्यंत दुर्दैवी आहे.यापुढे महिनाभर कष्ट करणाऱ्या एसटी कर्मचाऱ्याचा पगार दरमहा ७ तारखेला त्यांच्या बँक खात्यांत जमा करण्यात येईल. त्यासाठी राजशिष्टाचार सोडून महामंडळाचे अध्यक्ष म्हणून मी स्वतः अर्थ खात्याच्या अधिकाऱ्यांना भेटून विनंती करेन.परंतु आर्थिक अडचणीमुळे कर्मचाऱ्यांचे वेतन कधीही रखडणार नाही,याची जबाबदारी मी घेईन,असेही आश्वासन मंत्री सरनाईक यांनी एसटी कर्मचाऱ्यांना दिले.ते एसटी मुख्यालयात महामंडळाच्या अध्यक्षपदाचा कार्यभार स्वीकारतांना बोलत होते.यावेळी एसटी महामंडळाच्या संचालक मंडळाचे सदस्य व परिवहन आयुक्त विवेक भीमनराव, एसटी महामंडळाचे उपाध्यक्ष व व्यवस्थापकीय संचालक डॉ.माधव कुसेकर व सर्व खाते प्रमुख उपस्थिती होते.