कुरखेडा(गडचिरोली):-क्षुल्लक कारणावरून तिघा मित्रांनी मिळून कुरखेडा तालुक्याच्या चिखली येथील जितेश पगडवार या २८ वर्षीय तरुणाची हत्या केल्याचे पोलीस तपासात उघड झाले आहे.शुक्रवारी,९ ऑगस्ट रोजी पहाटे चिखली-वडेगाव मार्गावर जितेश पगडवार तरुणाचा मृतदेह आढळून आल्याने परिसरात एकच खळबळ उडाली होती.हत्या प्रकरणी पोलिसांनी तपासाची चक्रे वेगाने फिरवित अवघ्या काही तासांतच गावातीलच तीन तरुणांना अटक केली.मोबाइलच्या क्षुल्लक वादावरून हत्या केल्याची कबुली तिन्ही आरोपींनी कुरखेडा पोलिसांनी दिली.जितू ऊर्फ विशाल पिसोरे वय १९ वर्षे,वैभव सहारे वय १९ वर्षे,अमन पठाण वय २० वर्षे सर्व रा.चिखली अशी अटक करण्यात आलेल्या तरुणांची नावे आहेत.
प्राप्त माहितीनुसार,तिन्ही आरोपी मित्र आहेत.आरोपी जितू ऊर्फ विशाल पिसोरे याचा मोबाइल काही दिवसांपूर्वी हरवला होता.हा मोबाइल जितेशनेच पळविला असेल,अशी आरोपीना शंका होती.यावरून मागील काही दिवसांपासून त्यांच्यात वाद सुरू होता. हा वाद विकोपाला गेल्याने वडेगाव रस्त्यावर गुरुवारी,दिनांक-८ ऑगस्टच्या रात्री १०.३० ते ११ वाजताच्या दरम्यान तिघांनीही जितेशच्या डोक्यावर लोखंडी सळाखीने वार करीत त्याची हत्या केली. शुक्रवारी दि.९ ऑगस्ट रोजी सदरची घटना उघडकीस येताच कुरखेडा पोलिसांनी गुन्हा नोंद करून तपासाची चक्रे वेगाने फिरवित गावातील जितू,वैभव व अमन यांना त्याच दिवशी चौकशीसाठी ताब्यात घेतले. सुरुवातीला तिघांनीही उडवाउडवीची उत्तरे दिली. मात्र,पोलिसी खाक्या दाखवताच आरोपींनी गुन्ह्याची कबुली दिली.त्यांच्या विरोधात भारतीय न्याय संहिता २०२३ च्या कलम १०३ (१), २३८,३(५) अन्वये गुन्हा दाखल करण्यात आला आहे. घटनेचा अधिक तपास ठाणेदार महेंद्र वाघ यांच्या मार्गदर्शनात सुरू आहे.
