उद्याला कोंढाळा येथे सकल हिंदु समाज मंडळाच्या वतीने “हिंदु संमेलन”.. -विविध कार्यक्रमांचे आयोजन..

कोंढाळा(गडचिरोली):-हिंदु जागृतीच्या दिशेने तसेच हिंदु समाजामध्ये नविन उर्जा आणि चेतना प्रदान करण्यासाठी संपूर्ण हिंदु समाज,सनातन धर्म,सनातन संस्कृती आणि सामाजिक एकतेचे प्रतिक असलेले “विराट हिंदु संमेलन” चे आयोजन सकल हिंदु समाज मंडळ कुरुड यांचे वतीने उद्या,मंगळवार १० फेब्रुवारी रोजी दुपारी १ वाजताच्या सुमारास देसाईगंज तालुक्याच्या श्री दत्त मंदीर कोंढाळा येथे करण्यात आले आहे.

राष्ट्रीय स्वयंसेवक संघ(RSS)च्या स्थापना शताब्दी (१०० वर्षे)निमित्त २०२६ मध्ये देशभर विराट हिंदू संमेलनाचे आयोजन सकल हिंदू समाजाच्या माध्यमातून केले जात आहे.या संमेलनाचा मुख्य उद्देश हिंदू समाजाला संघटित करणे,सामाजिक समरसता वाढवणे आणि सांस्कृतिक जागृती करणे असून या संमेलनांमध्ये संत,स्थानिक नेते आणि हजारो नागरिकांचा सहभाग असतो,तसेच अनेकदा कलश यात्राही काढली जाते.संमेलनात सामाजिक एकता,जिहादसारख्या मुद्द्यांवर चर्चा,मुलींना सक्षम करणे आणि हिंदू समाजातील ‘शक्ति स्मरण’ यावर भर दिला जातो.चालू महिन्यातील मेरठ,गाझियाबाद आणि जयपूर यांसारख्या विविध ठिकाणी अशी मोठी संमेलने झाली आहेत.आरएसएसच्या शताब्दी वर्षात हिंदू समाजाला एकजूट करण्यासाठी आणि त्यांच्या सांस्कृतिक वारश्याची आठवण करून देण्यासाठी हे विराट हिंदू संमेलन आयोजित केले जात आहे.त्यानुसार, उद्या मंगळवारी कोंढाळा येथील दत्त मंदिर परिसरात दुपारी १ वाजेपासून वेषभुषा स्पर्धा,रांगोळी स्पर्धा, देशभक्ती गीत,नृत्य,वक्त्यांचे मार्गदर्शन,संत आर्शिवचन, हनुमान चालीसा,सामुहिक आरती व महाप्रसादाचे आयोजन करण्यात आले आहे.सदरच संमेलनास ग्रामस्थांनी मोठ्या संख्येने उपस्थित राहण्याचे आवाहन आयोजकांनी केले आहे.