कुष्ठांतेयांच्या मानवी अधिकारासाठी विद्यार्थ्यांचा “पत्रलेखन” उपक्रम..

गडचिरोली :-सक्षम कुष्ठांतेय स्वाभिमानी संस्था, नागभीड(गडचिरोली व चंद्रपूर जिल्हा)अलर्ट इंडिया मुंबई व राष्ट्रीय कुष्ठरोग निर्मुलन कार्यक्रम,शासकीय मुला-मुलींचे आश्रम शाळा,मुलचेरा यांच्या संयुक्त समन्वयाने “जागतिक कुष्ठरोग दिन” नुकताच साजरा करण्यात आला.त्या निमित्ताने शासकीय मुला-मुलींचे आश्रम शाळा मुलचेरा येथे कुष्ठांतेयांच्या मानवी अधिकारासाठी विद्यार्थ्यांचा “पत्रलेखन” उपक्रम पार पाडला.या कार्यक्रमात विद्यार्थ्यांना कुष्ठरोग विषयीची शास्त्रीय माहिती देण्यात आली.त्यानंतर विद्यार्थ्यांनी पोस्टकार्ड वर कुष्ठरोगाची लक्षणे,कुष्ठांतेयाचे अधिकार याबाबतची माहिती लिहुन कुष्ठांतेयासोबत कुटुंबात,समाजात, सार्वजनिक ठिकाणी तसेच शासकीय स्तरावर कसलाही भेदभाव न करता सर्व कुष्ठांतेयांना सर्वसामान्य नागरिकांप्रमाणे जीवन जगण्याचा अधिकार असल्यामुळे कुष्ठांतेयांसोबत प्रतिष्ठेने व सन्मानपूर्वक वागणूक देण्याचा संदेश पत्राद्वारे कुटुंबीयांसह नातेवाईकांना देण्यात आला.पार पडलेल्या कार्यक्रमास तब्बल ७१ विद्यार्थ्यांनी   सहभाग नोंदवून उपस्थिती दर्शविली.तसेच शाळेच्या मुख्याध्यापिका कोलते,अध्यापक चलाख, आरोग्य विभागाचे तालुका आरोग्य सहाय्यक मिसार, आरोग्यसेविका शितल कुसणाके,प्यारा मेडिकल वर्कर रामजी वड्डे,क्षयरोग पर्यवेक्षक संतोष भुरसे,आरोग्य मित्र काळबांदे,आशा वर्कर सुमीत्रा सरकार,सक्षम कुष्ठांतेय स्वाभिमानी संस्था अलर्ट इंडिया मुंबईचे क्रिष्णा निकुरे, मिलींद बारसींगे आदी उपस्थित होते.