अवैध धंदेवाल्यांशी मधूर संबंध; दोन पोलिसांना ठाण्यातून केले ‘गेट आऊट’..!

भंडारा :-जिल्ह्यातच नव्हे तर इतरही जिल्ह्यात अनेक पोलिस कर्मचारी अवैध धंदेवाल्यांशी मधूर संबंध ठेवतात.याला अपवाद जेमतेम बोटावर मोजण्याइतकेच पोलीस असतील की ज्यांना पैश्याची हाव नाही.नाहीतर महिना भरला की,दारू वाल्यांची घरे हुडकून काढणे, तंबाखू विक्रेत्यांकडून पाकिटे,होलसेल दारू पुरवठा करणाऱ्यांकडून पाकिटे,अवैध सट्टा-पट्टी वाल्यांकडून पाकिटे,अवैध रेती वाल्यांकडून पाकिटे व इतर अशी अनेक पाकिटे अनेकांच्या घश्यात गेल्याशिवाय अवैध धंदे चालणार कशी? पोलिसांनी मनावर आणले तर सर्व अवैध धंदे बंद झाल्याशिवाय राहणार नाही.पण ‘चलती का नाम गाडी’ असे केले जाते.कित्येक अवैध धंदेवाल्यांकडे कुठल्या ना कुठल्या तरी साहेबांचा नंबर असतोच,हेही तितकेच खरे. “जो सापडला तो चोर अन्यथा मी त्यातला नाहीच,असे म्हणणाऱ्यांची संख्या कमी नाही बरं”. अश्याच प्रकारे भंडारा जिल्ह्याच्या मोहाडी तालुक्यातील करडी पोलिस ठाण्यामध्ये काही पोलिस कर्मचाऱ्यांचे अवैध धंदेवाल्यांशी मधूर संबंध असल्याची माहिती समोर येताच भंडारा जिल्हा पोलिस अधीक्षक नुरुल हसन यांनी दोन पोलीस कर्मचाऱ्यांना कार्यरत ठाण्यातून ‘गेट आऊट’ करीत जिल्हा पोलिस मुख्यालयात ‘कम इन’ करून तडकाफडकी बदली केली आहे.कमलेश शेंडे आणि उमेश मेश्राम अशी दोघांची नावे आहेत.मोहाडी तालुक्यातील वैनगंगा नदीच्या दोन बाजूंमध्ये विभागलेल्या करडी परिसरात अनेक अवैध धंदे फोफावली आहेत.अवैध रेती वाहतूक,जुगार अड्डे, दारूभट्ट्या व इतर धंदे जोमात सुरू असूनही त्यावर पोलिस विभागाचे काही कर्मचारी चिरीमिरी घेऊन  पांघरून घालत आहेत.जुगारावर धाड टाकण्याआधी गोपनीय माहिती जुगारचालकांना देऊन सक्रीय केले जात होते.पोलिस कर्मचाऱ्यांना खुश करण्यासाठी खास ओल्या मटन पार्ट्या रंगल्या होत्या.सदरचा प्रकार उघडकीस येताच पोलीस विभागाच्या प्रतिमेवर प्रश्नचिन्ह निर्माण झाले होते.याची दखल स्वतः पोलीस अधीक्षकांनी घेतली आणि कमलेश शेंडे व उमेश मेश्राम यांची भंडारा जिल्हा पोलिस मुख्यालयात तडकाफडकी बदली करण्यात आली आहे.