दुचाकीला जोरदार धडक देऊन कारचालक फरार; दोघेजण गंभीर जखमी…

भंडारा :-भरधाव कारने पाठीमागून दुचाकीला जोरदार धडक दिल्याने दुचाकीवरुन जाणारे दोघेही गंभीर जखमी झाल्याची घटना आज,सोमवारी ९ सप्टेंबरला दुपारी १ वाजताच्या सुमारास देव्हाडी रेल्वे उड्डाणपुलावर घडली.अपघातानंतर चारचाकी वाहनाने घटनास्थळावरुन पळ काढला.सुकळी येथील अक्षय मंगरू फेंडर वय २७ वर्षे तसेच त्याची काकी नंदा राजेंद्र फेंडर वय ४२ वर्षे हे तुमसर येथे काही कामानिमित्त दुचाकीने जात होते.यावेळी देव्हाडी उड्डाणपुलावर दुचाकीला पाठीमागून येणाऱ्या भरधाव कारने त्यांच्या दुचाकीला जोरदार धडक दिली.या धडकेमध्ये दुचाकीवरील दोघेही रस्त्यावर पडले.त्यांच्या हाताला, पायाला व तोंडाला गंभीर इजा झाली.धडक दिल्यानंतर चारचाकी वाहन घटनास्थळावरून खापा मार्गे फरार झाले.अपघातात गंभीर जखमी झालेल्या नंदा व अक्षय यांना परिसरातील नागरिकांनी तुमसर येथील उपजिल्हा रुग्णालयात उपचाराकरिता दाखल केले.