रेती माफियांची मुजोरी; मंडळ अधिकाऱ्याला उडवण्याचा प्रयत्न..

भंडारा :-रेती माफियांची मुजोरी दिवसेंदिवस वाढतच चालली आहे.रेती माफिया ‘चोरी तर चोरी वरून शिणाजोरी’ करू लागले असल्याचा प्रकार नुकताच भंडारा जिल्ह्याच्या पवनी तालुक्यातील अड्याळ पोलीस स्टेशन अंतर्गत येणाऱ्या पहेला ते बोरगाव खुर्द मार्गावर घडली.अवैध रेती घेऊन जाणाऱ्या एका ट्रक चालकाने मंडळ अधिकाऱ्याच्या गाडीला धडक देऊन त्यांना जीवे मारण्याचा प्रयत्न केल्याची घटना समोर आली आहे.

मंडळ अधिकारी पृथ्वीराज अहीर वय ४७ वर्षे आणि महसूल सेवक अमित बावनकर यांच्यासह खासगी कारने शासकीय कामासाठी गोलेवाडीकडे जात होते. पवनीच्या मुख्य मार्गावर त्यांना एमएच ४० बीजी ५१७५ क्रमांकाचा रेतीने भरलेला ट्रक संशयास्पद दिसला.ट्रक तपासल्यावर, रेतीची रॉयल्टी वा इतर दस्तऐवज नसल्याने रेती अवैधपणे नेली जात असल्याचे उघड झाले.दरम्यान,ट्रक मालक आणि त्याचे साथीदार घटनास्थळी पोहोचले. त्यांनी अधिकाऱ्यांशी हुज्जत घालून ट्रक भंडारा रोडच्या दिशेने पळवून नेला.अहीर यांनी कारने ट्रकचा पाठलाग सुरू केला,तेव्हा ट्रक चालकाने गाडी मागे जाऊन अधिकाऱ्यांच्या कारला जोरदार धडक दिली. या धडकेत कारचे नुकसान झाले असून,अधिकारी थोडक्यात बचावले.घटनेनंतर,अहीर यांनी अड्याळ पोलिस ठाण्यात तक्रार दाखल केली.प्रकरणी पोलिसांनी ट्रक चालक आणि मालकाविरुद्ध गुन्हा दाखल करून पुढील तपास सुरू केला आहे.