शहराच्या मध्यभागी असलेल्या गणेशनगर परिसरात अस्वलाचे दर्शन…

गोंदिया :-शहरात काल,शनिवारी पहाटे शहराच्या मध्यभागी असलेल्या गणेशनगर या परिसरातील जुन्या जिल्हा परिषद आणि सध्या प्रधानमंत्री ग्राम सडक योजना यांचे कार्यालय तसेच उपविभागीय सार्वजनिक बांधकाम विभाग यांचे कार्यालय आहे.या कार्यालयाच्या परिसरात काल,शनिवारी अचानक पहाटे-पहाटे अस्वल आल्याचे सकाळी फिरायला जाणाऱ्या नागरिकांना दिसल्याने एकच खळबळ उडाली.अस्वल आल्याची बातमी वाऱ्यासारखी शहरात पसरली.नागरिकांनी अस्वलाला बघण्यासाठी लोकांनी एकच गर्दी केली होती.याची माहिती पोलिस व वन विभाग तसेच अग्निशमन विभागाला देण्यात आली.माहिती मिळताच वनविभाग आणि पोलिस पथक दाखल झाले. नागरिकांना त्या परिसरापासून दूर ठेवण्यात आले. अस्वलाला पकडण्याकरीता नवेगाव नागझिरा व्याघ्र प्रकल्पातील पथकाला पाचारण करण्यात आले.पथकाने बेशुद्ध करण्याचे इंजेक्शन बंदुकीच्या सहाय्याने दिले.त्यानंतर अस्वल बेशुद्ध झाल्याने पिंजऱ्यात कैद करून वैद्यकीय तपास पूर्ण करून जंगलात सोडून देण्यात आले.तब्बल पाच तासांच्या अथक परिश्रमानंतर पथकाला अस्वलाला बेशुद्ध करून पकडण्यात यश आले.शहरात अस्वल शिरल्यामुळे भितीचे वातावरण निर्माण झाले आहे.