माझा वाढदिवस-एक झाड उपक्रम; देसाईगंज आदर्श महाविद्यालयाच्या वतीने पर्यावरण संवर्धनाचा संदेश..

देसाईगंज(गडचिरोली):-पर्यावरण संवर्धनाचा संदेश समाजापर्यंत पोहोचावा आणि वृक्षारोपणाची सवय प्रत्येकामध्ये रुजावी या उद्देशाने आदर्श कला,वाणिज्य व विज्ञान महाविद्यालय,देसाईगंज येथे “माझा वाढदिवस-एक झाड” हा अभिनव उपक्रम राबविण्यात येत आहे. महाविद्यालयाच्या निसर्ग मंडळ व परिसर सौंदर्यीकरण विभागाच्या वतीने हा उपक्रम वर्षभर सातत्याने राबविला जाणार आहे.

या उपक्रमाअंतर्गत महाविद्यालयातील प्राध्यापक, शिक्षकेत्तर कर्मचारी तसेच विद्यार्थी आपल्या वाढदिवसानिमित्त महाविद्यालय परिसरात किमान एक झाड लावून त्याचे संगोपन करण्याचा संकल्प करतील.वृक्षारोपणासोबतच झाडांच्या नियमित देखभालीवरही विशेष भर दिला जाणार असून, पर्यावरण संरक्षणाची जाणीव विद्यार्थ्यांमध्ये दृढ करण्याचा प्रयत्न करण्यात येणार आहे.

महाविद्यालयाचे प्राचार्य डाॅ.श्रीराम गहाणे यांनी या उपक्रमाचे स्वागत करून सर्वांनी वाढदिवस साजरा करतांना निसर्गाला एक वृक्ष भेट देण्याचे आवाहन केले.निसर्ग मंडळ व परिसर सौंदर्यीकरण विभागाचे प्रमुख प्रा.डाॅ.निलेश हलामी यांनी या उपक्रमामुळे महाविद्यालय परिसर अधिक हिरवेगार व पर्यावरणपूरक होण्यास मदत होईल,तसेच विद्यार्थ्यांमध्ये सामाजिक व पर्यावरणीय जबाबदारीची भावना विकसित होईल,असा विश्वास व्यक्त केला.

महाविद्यालयाने विद्यार्थी,पालक व नागरिकांना या उपक्रमात सहभागी होऊन पर्यावरण संवर्धनाच्या चळवळीत आपले योगदान देण्याचे आवाहन केले आहे.