दहावीत शिकणाऱ्या मुलीवर अत्याचार; दोन आरोपी फरार..

वर्धा :-जिल्ह्याच्या आर्वी तालुक्यात एक धक्कादायक प्रकार उजेडात आला आहे.दोन नराधमांनी इयत्ता दहावीत शिकणाऱ्या मुलीच्या असह्यतेचा गैरफायदा घेत पैश्याचे आमिष दाखवून वारंवार अत्याचार केला.यात पिडीत मुलगी पाच महिन्याची गर्भवती राहिल्याने आर्वी पोलिसांनी पीडितेच्या तक्रारीनंतर दोघांवर गुन्हा दाखल केला आहे.२५ वर्षीय गौरव सुरेश बोके व ५० वर्षीय मंगम उईके अशी आरोपींची नावे असून गुन्हा दाखल होताच दोघेही फरार झाले.पोलिसांकडून दोघांचाही शोध घेतला जात असून त्यांना पकडण्यासाठी पथक रवाना करण्यात आले आहे.प्रकरणाचा पुढील तपास उपविभागीय पोलिस अधिकारी चंद्रशेखर ढोले यांच्या मार्गदर्शनात आर्वी पोलीस ठाण्याचे ठाणेदार सतीश डेहनकर यांच्याकडून सुरू करण्यात आला आहे. प्रकरणातील आरोपी गौरव बोके याने एका १५ वर्षीय अल्पवयीन मुलीला मोबाइलवर फोन करून जीवे मारण्याची धमकी दिली आणि त्याच्या जुन्या घरी बोलावले.तेथे त्याने पिडीतेवर अत्याचार केला.त्यानंतरही त्याने वारंवार शोषण केले.दरम्यान,दुसरा आरोपी मंगम उईके यानेही बळजबरीने अत्याचार केला.पीडिता पाच महिन्याची गर्भवती राहिल्याने सदरचा धक्कादायक प्रकार उजेडात आला.पीडितेने आपली बदनामी होईल, या भीतीने याबाबत कुणालाही सांगितले नाही.मात्र, पीडितेच्या बहिणीने धीर दिल्याने आर्वी पोलिस ठाण्यात तक्रार दिली.त्यानुसार,पोलिसांनी विविध कलमान्वये गुन्हा दाखल करून आरोपींचा शोध सुरू केला आहे.