देसाईगंजच्या विहीरगाव(पोटगाव)येथील ‘त्या’ मातेने रुग्णवाहिकेतच दिला गोंडस मुलीला जन्म..

देसाईगंज(गडचिरोली):-देसाईगंज तालुक्याच्या विहीरगाव(पोटगाव)येथील रहिवासी स्वाती चांगदेव नेवारे ह्या माहेरी बाळंतपणासाठी गेल्या असता  आरोग्य केंद्रातून रुग्णवाहिकेद्वारे गोंदियाला रेफर करत असतांनाच काही अंतरावरील मार्गावर गर्भवतीने गोंडस मुलीला जन्म दिल्याची घटना नुकतीच अर्जुनी मोरगाव तालुक्यातील नवेगावबांध-कोहमारा मार्गावर घडली.

गडचिरोली जिल्ह्याच्या देसाईगंज तालुक्यातील विहीरगाव(पोटगाव)येथील रहिवासी स्वाती चांगदेव नेवारे ही दुसऱ्या बाळंतपणासाठी गोंदिया जिल्ह्याच्या  अर्जुनी मोरगाव तालुक्यातील माहेरी देवलगाव-नवेगावबांध येथे गेल्या होत्या.बाळंतपणाच्या वेदना सुरू होताच तिला शासकीय रुग्णालयात सोमवार ६ जुलै २०२६ रोजी भरती करण्यात आले होते.प्रसूती अतिजोखमीची असल्याने १०८ रुग्णवाहिका बोलावून तिला गोंदियाला रेफर करण्यात आले.परंतु नवेगावबांधची सीमा पार केल्यानंतर नवेगावबांध ते कोहमारा मार्गावर गर्भवतीला प्रसववेदना सुरू झाल्या. तीव्र वेदना जाणवू लागल्याने समयसूचकता बाळगून डॉ.ज्ञानेश्वर कापगते यांनी आशा कार्यकर्ती व रुग्णवाहिकेच्या चालकाच्या सहकार्याने सुरक्षित स्थळी रुग्णवाहिका थांबवून सर्वांच्या सहकार्याने रुग्णवाहिकेतच सुरक्षित प्रसूती केली.गर्भवती मातेने एका गोंडस मुलीला जन्म दिला.रुग्णवाहिकेत प्रसूती झाल्यानंतर बाळंतीण व नवजात बाळाला नवेगावबांध येथील ग्रामीण रुग्णालयात भरती करून त्वरित उपचार करण्यात आले.त्यानंतर पुढील उपचारासाठी गोंदिया येथील बाई गंगाबाई महिला रुग्णालयात हलविण्यात आले.मात्र,तिथे योग्य उपचार न मिळाल्याने गोंदिया येथील एका खासगी रुग्णालयात माता आणि बाळाला दाखल करण्यात आले.सध्या दोघेही सुखरूप आहेत.