गांजा तस्करी; दोन लाख दहा हजार रुपयांचा मुद्देमाल हस्तगत..

चंद्रपूर :-ओडिशा राज्यातून गांजाची खरेदी करून चंद्रपुरात विक्रीसाठी घेऊन येणाऱ्या एका गांजा तस्कराच्या चंद्रपूर स्थानिक गुन्हे शाखेच्या पथकाने  आज,गुरुवार २३ एप्रिलच्या पहाटे दोन वाजेच्या सुमारास शहराच्या कुंदन प्लाझा चौक परिसरात मुसक्या आवळल्या.शहादेव ठाकूरदास मलिक वय ५३ वर्षे असे अटक करण्यात आलेल्या आरोपीचे नाव असून तो मूळचा गडचिरोली जिल्ह्यातील चामोर्शी तालुक्याच्या ठाकूरनगर येथील रहिवासी असून हल्ली चंद्रपूर शहराच्या राष्ट्रवादी नगर परिसरात वास्तव्यास आहे. पोलिसांनी त्याच्याकडून सुमारे दोन लाख रुपये किंमतीचा गांजा(८.०१५ किलो वजनाची गांजाची पाने,फुले व बिया)तसेच एक जुना इन्फिनिक्स कंपनीचा मोबाईल असा एकूण दोन लाख दहा हजार रुपयांचा मुद्देमाल हस्तगत करून त्याच्यावर चंद्रपूर शहराच्या रामनगर पोलीस ठाण्यात अंमली औषधी द्रव्ये व मनोव्यापारावर परिणाम करणारे पदार्थ अधिनियम १९८५ चे कलम ८(क),२० (ब)(ii)(ब) अन्वये गुन्हा नोंद करण्यात आला आहे.प्रकरणाचा पुढील तपास रामनगर पोलीस प्रशासन करीत आहे.

सदरची कारवाई पोलीस अधीक्षक मुम्मका सुदर्शन, अप्पर पोलीस अधीक्षक ईश्वर कातकडे यांच्या मार्गदर्शनात ठाणेदार अमोल काचोरे यांच्या नेतृत्वात पोलीस उपनिरीक्षक विनोद भुरले,सुनील गौरकार, पोलीस हवालदार सुभाष गोहोकार,सतीश अवथरे, रजनिकांत पुठ्ठावार,दीपक डोंगरे,इम्रान खान,पोलीस अंमलदार हिरालाल गुप्ता,किशोर वाकाटे,शशांक बदामवार आदींनी केली.