भीषण अपघातात तहसीलदाराचा मृत्यू..!

बीड :-भरधाव वेगात असलेल्या चारचाकी वाहनावरील अचानकपणे नियंत्रण सुटून बीड जिल्ह्याच्या केज तालुक्याचे तहसीलदार राकेश गिड्डे यांचा आज,गुरुवार ९ एप्रिल रोजी पहाटे झालेल्या भीषण अपघातात दुर्दैवी मृत्यू झाला.सदरची दुर्घटना ही लातूर-अंबाजोगाई महामार्गावरील रेणापूर फाट्याजवळ घडली.एका कर्तव्यदक्ष आणि तरुण अधिकाऱ्याचा अचानक मृत्यू झाल्याने बीड जिल्ह्यात शोककळा पसरली आहे.त्यांच्या निधनाने राज्याचे महसूलमंत्री चंद्रशेखर बावनकुळे यांच्यासह महसूल विभागाने शोक व्यक्त केला आहे.

आज पहाटेच्या सुमारास तहसीलदार राकेश गिड्डे हे स्वतःच्या कारने प्रवास करत होते.पहाटे पाचच्या  सुमारास रेणापूर फाट्याजवळ येताच त्यांचे वाहनावरील नियंत्रण सुटले.यात कार रस्त्याच्या खाली घसरून पलटी झाली.अपघाताची तीव्रता इतकी बिषण होती की,त्यात त्यांचा जागीच मृत्यू झाला.अपघाताच्या वेळी गाडीत ते एकटेच होते.पहाटेची  वेळ असल्याने परिसरात फारशी वर्दळ नव्हती.मात्र, अपघाताचा मोठा आवाज ऐकून स्थानिक नागरिकांनी घटनास्थळी धाव घेत मदतकार्य सुरू केले.पण तोपर्यंत खूप उशीर झाला होता.घटनेची माहिती मिळताच पोलिसांनी घटनास्थळ गाठून पंचनामा केला व पुढील तपास सुरू केला आहे.दुर्दैवी घटनेमुळे प्रशासन आणि स्थानिक पातळीवर हळहळ व्यक्त केली जात आहे.