पतीच्या नजरेसमोरच वाघाची झडप; वाघाच्या हल्ल्यात पत्नी ठार..

गोंदिया :-पती-पत्नी दोघेही शेतात कामे करीत असतांनाच पतीच्या नजरेसमोरच पत्नीवर वाघाने हल्ला चढवला.अश्यातच आरडाओरड केली असता वाघाने पळ काढला.मात्र,वाघाने चढविलेल्या हल्ल्यात महिलेने प्राण गमावल्याची चित्तथरारक घटना गोंदिया जिल्ह्याच्या सडक अर्जुनी तालुक्यातील माहुली गाव परिसरातील शेत शिवारात काल शुक्रवारी दुपारी चार वाजताच्या सुमारास घडली.अचानकपणे घडलेल्या घटनेने परिसरात एकच खळबळ उडाली.लक्ष्मी हेमराज सयाम वय ६० वर्षे,रा.माहुली,ता.सडक अर्जुनी असे वाघाने हल्ला चढवून ठार केलेल्या  महिलेचे नाव आहे.

दोघेही पती-पत्नी काल शुक्रवारी शेतात तुरीच्या शेंगा तोडण्यासाठी गेले होते.तुरीच्या शेंगा तोडत असतांनाच अचानकपणे वाघाने लक्ष्मी सयाम यांच्यावर झडप घातली.पती हेमराज हे जवळच असल्याने वाघ पाहून घाबरले आणि जोर-जोराने ओरडू लागले.ओरडण्याचा आवाज ऐकून परिसरातील शेतकरी धावून गेले.वाघाने महिलेला पकडुन ठेवल्याचे पाहून आरडाओरड करण्यास सुरुवात केली.यामुळे वाघाने महिलेस जागीच सोडून जंगलाच्या दिशेने पळ काढला.वाघाने केलेल्या झडपेने महिलेचा जागीच मृत्यू झाला.लागलीच उपस्थित शेतकऱ्यांनी घटनेची माहिती वन विभाग व पोलिसांनी दिली.त्यानुसार,सडक अर्जुनी वनविभागाचे प व डुग्गीपार पोलिस पथकासह घटनास्थळी दाखल झाले.घटनेनंतर गावकऱ्यांनी आक्रमक होत वाघाचा त्वरित बंदोबस्त करा,अन्यथा तीव्र आंदोलन करण्याचा इशारा दिला. यानंतर वनविभागाने वाघाला बंदोबस्त करण्यासाठी उपाययोजना सुरू केल्या.