ट्रकची दुचाकीला जोरदार धडक; एकाचा जागीच मृत्यू तर एकाचा उपचारादरम्यान मृत्यू..

चंद्रपूर :-जिल्ह्याच्या मूल पोलीस ठाण्याच्या हद्दीत  येणाऱ्या गोंडपिपरी-खेडी मार्गावर आज,सोमवार २९ सप्टेंबर रोजी दुपारच्या सुमारास भीषण अपघाताची घटना घडली असून एका भरधाव वेगात असलेल्या ट्रकने दुचाकीला जोरदार धडक दिल्याने दुचाकीस्वार तिघे तरुण खाली कोसळून यातील एकजण जागीच ठार झाला,तर दुसऱ्या तरुणाचा रुग्णालयात उपचारादरम्यान मृत्यू झाला.तर तिसरा गंभीर जखमी झाल्याने त्याला चंद्रपूर जिल्हा रुग्णालयात हलविण्यात आले आहे.सारंग गंडाटे वय २६ वर्षे,रा.पेंढरी मक्ता,ता.सावली,जि.चंद्रपूर याचा जागीच मृत्यू झाला.तर प्रियांशु गंडाटे वय २३ वर्षे, रा.पेंढरी मक्ता,ता.सावली,जि.चंद्रपूर याचा मूल उपजिल्हा रुग्णालयात उपचारादरम्यान मृत्यू झाला.याशिवाय लंकेश समर्थ रा.मुंडाळा हा गंभीर जखमी झाला.तिघेही तरुण कापसाच्या फवारणीचे औषध खरेदी करून दुचाकीने गावाकडे परत जात होते. दरम्यान,गोंडपिपरी-खेडी मार्गावर एका ट्रकने त्यांच्या दुचाकीला जोरदार धडक दिली.धडक बसताच सारंग घटनास्थळीच मृत पावला.घटना घडताच नागरिकांनी घटनास्थळी धाव घेत जखमींना तात्काळ उपचारार्थ मूल उपजिल्हा रुग्णालयात भरती केले.तिथे उपचार सुरू असतांनाच प्रियांशुची प्राणज्योत मावळली.तर लंकेशला गंभीर मार लागल्याने प्राथमिक उपचार केल्यानंतर पुढील उपचाराकरिता चंद्रपूरला हलविण्यात आले आहे.