टँकर व पिकअपची समोरासमोर धडक; एकजण ठार तर दोघेजण गंभीर जखमी..

चंद्रपूर :-वणीहून चिमूरकडे साहित्य आणण्यासाठी जाणाऱ्या पिकअप वाहनाला विरुद्ध दिशेने भरधाव वेगात आलेल्या टँकर वाहनाने समोरासमोर जोरदार धडक दिल्याने पिकअप वाहनातील एकजण ठार तर दोघेजण गंभीर जखमी झाल्याची घटना काल रविवारी पहाटेच्या सुमारास वरोरा-चिमूर मार्गावरील रान तळोधी गावाजवळ घडली.यात ५७ वर्षीय दिलीप नारायण कोरपेनवार हे जागीच ठार झाले.तर गणेश गजानन डोहे वय २५ वर्षे,गौरव हनुमान भोसले वय १९ वर्षे अशी गंभीर जखमिंची नावे असून मृतक कोरपेनवार नगरपालिका शाळेचे मुख्याध्यापक असल्याची माहिती आहे.

दिलीप कोरपेनवार,गणेश व गौरव हे तिघेही वणीहून चिमूरकडे एमएच ४९-४४३१ क्रमांकाच्या पिकअपने

साहित्य आणण्यासाठी निघाले होते.अश्यातच वरोरा-चिमूर मार्गावरील रान तळोधी गावाजवळ पिकअप येताच एक भरधाव वेगाने टँकर वाहन समोरून आला आणि जोरदार धडक दिली.धडक इतकी भीषण होती की,तिघांपैकी दिलीप कोरपेनवार यांना जबर मार लागला.घटना घडताच टँकर वाहनाचा चालक

घटनास्थळावरून फरार झाला.घटना गावाजवळचीच असल्याने परिसरातील नागरिकांनी घटनास्थळी धाव घेत तिघांनाही वरोरा उपजिल्हा रुग्णालयात दाखल करण्यात आले.मात्र,अपघात इतका भीषण होता की,अपघातात तिघेही गंभीर जखमी झाले होते.अश्यातच रुग्णालयात दाखल करताच दिलीप कोरपेनवार यांना डॉक्टरांनी मृत घोषित केले व दोन्ही जखमींवर उपचार सुरू केले. घटनेची माहिती मिळताच वरोरा पोलिसांनी घटनास्थळ गाठत पंचनामा करून फरार टँकर वाहनाचा चालकाचा शोध सुरू केला.