उभ्या ट्रकला बसची धडक; बसच्या कंडक्टरचा मृत्यू तर १२ प्रवासी जखमी..

चंद्रपूर :-उभ्या ट्रकला भरधाव वेगाने येणाऱ्या बसने जोरदार धडक दिल्याने यात बसचा वाहक (कंडक्टर) जागीच गतप्राण झाला तर ११ ते १२ प्रवासी जखमी झाल्याची घटना शुक्रवारच्या रात्री १२.३० वाजे दरम्यान नागपूर-चंद्रपूर महामार्गावरील पडोली येथील हायटेक फार्मसी कॉलेज समोर घडली.संदीप वनकर रा.नगीना भाग परिसर,चंद्रपूर असे अपघातात मृत्यू झालेल्या वाहकाचे नाव आहे तर जखमींपैकी ३ जणांची प्रकृती चिंताजनक असल्याची माहिती आहे.

माहितीनुसार,रात्रीच्या सुमारास बस नागपूरवरून चंद्रपूरकडे येत होती.अशातच नागपूर-चंद्रपूर महामार्गावरील पडोली येथील हायटेक फार्मसी कॉलेज समोर नादुरुस्त ट्रक रस्त्याच्या कडेला उभा होता.त्यातच रात्री अंधार असल्याने बसची उभ्या ट्रकला जोरदार धडक बसली.धडक इतकी जोरदार होती की,अपघातात कंडक्टरचा(वाहकचा) जागीच  मृत्यू झाला.तर ११ ते १२ प्रवासी जखमी झाले. दरम्यान,रात्री जवळपास साडेबारा वाजताच्या सुमारास हा अपघात झाला.घटनेची माहिती मिळताच पोलिसांनी घटनास्थळ गाठत पुढील कारवाई सुरू केली आहे.अपघातातील सर्व जखमींना जिल्हा सामान्य रुग्णालयात दाखल करण्यात आले आहे. सदर प्रकरणाचा अधिक तपास पडोली पोलीस करीत आहेत.