अज्ञात वाहनाची धडक; दुचाकी चालक तरुणाचा घटनास्थळावरच मृत्यू…

नागपूर :-नागपूर शहरात मजुरी करणाऱ्या व दुचाकीने स्वगावी जात असतांना वाटेतच अज्ञात वाहनाने धडक दिल्याने गंभीर जखमी झालेल्या तरुणाचा घटनास्थळावरच मृत्यू झाल्याची घटना काल,शुक्रवारी ३१ जानेवारीच्या दुपारी देवलापार,ता. रामटेक पोलिस ठाण्याच्या हद्दीतील नागपूर-जबलपूर राष्ट्रीय महामार्गावरील गुप्तगंगा शिवारात घडली.राहुल गोविंदसिंग ठाकूर वय ३० वर्षे,रा.जबलपूर,मध्यप्रदेश असे अपघातात ठार झालेल्या तरुणाचे नाव आहे.

 राहुल हा नागपूर शहरात मजुरी करायचा.एमपी-२०/झेडएल-३१५६ क्रमांकाच्या दुचाकीने एकटाच नागपूरहून जबलपूरला जात असतांना वेगात आलेल्या अज्ञात वाहनाने त्याच्या वाहनाला गुप्तगंगा शिवारात जोरात धडक दिली.धडक इतकी भीषण होती की,अपघातात त्याचे शरीर छिन्नविछिन्न झाले असल्याची माहिती प्रत्यक्षदर्शिंनी दिली.घटनेची माहिती होताच पोलिसांनी घटनास्थळ गाठून पंचनामा केला व मृतदेह उत्तरीय तपासणीसाठी देवलापार येथील ग्रामीण रुग्णालयात दाखल केला.घटने प्रकरणी देवलापार पोलिसांनी अज्ञात वाहन चालकाविरुद्ध गुन्हा नोंदवून पुढील तपास सुरू केला आहे.