मोठी बातमी महाविद्यालयीन विद्यार्थ्याचा कुरखेडा सतीनदी पात्रात आढळला मृतदेह; घातपाताचा संशय..

कुरखेडा(गडचिरोली):-कुरखेडा शहराच्या कुंभीटोला मार्गावरील सार्वजनिक नळ योजनेच्या विहीरीपासून काही अंतरावर असलेल्या सती नदीपात्रात एका महाविद्यालयीन विद्यार्थ्याचा आज,शनिवार २५ जानेवारीला सकाळी ६.३० वाजेच्या सुमारास मृतदेह आढळून आल्याने परिसरात एकच खळबळ उडाली आहे.रोहीत राजेंद्र तूलावी वय २० वर्षे रा.जैतपूरटोला ग्रामपंचायत गोठणगांव, ता.कुरखेडा असे मृत विद्यार्थ्याचे नाव आहे.

प्राप्त माहितीनुसार,आज शनिवार सकाळच्या सुमारास मॉर्निंग वॉकला(शारीरिक कसरत) जाणाऱ्या काही नागरिकांना सती नदी पात्रात कुणीतरी झोपलेल्या अवस्थेत दिसून आले.त्यानुसार नागरिकांनी जवळ जाऊन बघितले असता,एक मुलगा मृतावस्थेत दिसून आला.त्यानुसार नागरिकांनी याबाबत कुरखेडा पोलिसांना माहिती दिली.कुरखेडा पोलीस ठाण्याचे ठाणेदार महेन्द्र वाघ यांनी घटनास्थळ गाठून मृतदेह कुरखेडा उपजिल्हा रुग्णालयात उत्तरीय तपासणीसाठी पाठविला.मृतक युवक हा कुरखेडा शहराच्या मुनघाटे महाविद्यालयाच्या बि एस सी द्वितीय वर्षाचा विद्यार्थी असून त्याच्या अंगावरील बनियान,शर्ट व स्वेटर बाजूला काढून ठेवण्यात आल्याचे आढळून आले.त्यामुळे त्याच्या घातपाताची शक्यता वर्तविण्यात येत आहे.सदर घटनेचा पुढील तपास कुरखेडा पोलीस प्रशासन करीत आहे.