चोरीचा मोह अनावर झाला..! चोरी करायला गेला अन् तिथेच चिकटून राहिला..

नागपूर :-आपण अनेकदा बघितले व ऐकले सुद्धा आहे की,चोर चोरी करण्यासाठी वाट्टेल ‘त्या’ युक्त्या पणाला लावीत असतात.अंग मेहनत न करता झटपट पैश्याच्या नादात ‘चट मंगणी पट ब्याह..!’ करून आनंद द्विगुणित करीत असतात.पण,त्यातून मिळणारा आनंद हा क्षणिक असतो,हेच अनेकजण विसरून जातात आणि सर्वकाही गमावून बसतात.असाच काहीसा आगळा-वेगळा प्रकार एका अट्टल चोरट्याच्या बाबतीत उघडकीस आला आहे.चोरट्याने वाढदिवस साजरा केल्यानंतर विद्युत ट्रान्सफॉर्मरच्या पेटीतील साहित्य काढले आणि खांबावर असलेले साहित्य चोरण्यासाठी वर चढला.जिवंत तारेला स्पर्श होताच जोरात विजेचा धक्का लागला आणि चोरट्याचा घटनास्थळीच मृत्यू झाला.सदरची घटना हिंगणा पोलिस ठाण्याच्या हद्दीतील माऊलीनगर,जामठा येथे रविवारी मध्यरात्री २ वाजताच्या सुमारास घडली.

अंकुश राजेंद्र पटेल वय २५ वर्षे,रा.श्रमिकनगर, परसोडी,बेलतरोडी,नागपूर असे मृत चोरट्याचे नाव आहे.त्याने दोन मित्रांसोबत रविवारी रात्री नागपूर-बुटीबोरी मार्गावरील जामठा (ता.नागपूर ग्रामीण) परिसरातील एका धाब्यावर वाढदिवस साजरा केला. मध्यरात्री २ वाजताच्या सुमारात तिघेही घराकडे परत जात असतांना अंकुशला चोरीचा मोह अनावर झाला. लगेच तिघांनी जामठा येथील माऊलीनगर-९ मधील महावितरण कंपनीच्या ट्रान्सफॉर्मरचे साहित्य चोरण्याची योजना आखली.त्याने आधी ट्रान्सफॉर्मरच्या पेटीतील ग्रीपसह इतर उपकरणे चोरण्यासाठी काढून ठेवले.त्यामुळे वीजपुरवठा बंद झाला असावा,असे समजून तो खांबावर चढला आणि येथेच गफलत झाली.वर चढल्यावर त्याचा जिवंत तारेला स्पर्श झाला आणि लगेच मृत्युमुखी पडला.त्यामुळे त्याच्या दोन मित्रांनी तिथून पळ काढला.काल सोमवारी १३ जानेवारीच्या सकाळी नागरिकांना तो लोंबकळलेल्या अवस्थेत आढळून आला.माहिती मिळताच पोलिसांनी घटनास्थळ गाठून पंचनामा केला व मृतदेह उत्तरीय तपासणीसाठी पाठविला.त्याच्या अन्य दोन मित्रांचा शोध सुरू असून  याप्रकरणी हिंगणा पोलिसांनी आकस्मिक मृत्यूची नोंद करून तपास सुरू केला आहे.