येत्या ८ जानेवारीला पूर्व विदर्भातील मुस्लिम समाजाचा सामूहिक विवाह सोहळा देसाईगंज नगरीत..

देसाईगंज(गडचिरोली):-पूर्व विदर्भातील मुस्लिम समाजाचा सर्वात मोठा सामूहिक विवाह सोहळा येत्या ८ जानेवारीला बुधवारी दुपारी १२ वाजताच्या सुमारास देसाईगंज शहराच्या कमलानगर,किदवाई वार्ड या ठिकाणी संपन्न होणार आहे.दर वर्षीप्रमाणे याही वर्षी सुद्धा एकूण २२ जोडपी विवाह बंधनात अडकणार आहेत.या सामूहिक विवाह सोहळ्याचे आयोजन अहेले मुस्लिम जमातच्या वतीने हाजी बशीर पटेल सौदागर यांच्या प्रमुख मार्गदर्शनात करण्यात येणार आहे.कोरोना कालावधीतील दोन वर्षे वगळता यंदा मुस्लिम सामूहिक विवाह सोहळ्याचा हा बारावा वर्ष आहे.यात देसाईगंज मुस्लिम समाजातील युवक स्वतः पुढाकार घेऊन सर्व नियोजन करीत असतात. मुस्लिम समाजातील वर आणि वधूला अहेले मुस्लिम जमात सामूहिक विवाह सोहळा आयोजन कमेटीतर्फे पलंग,आलमारी आणि सर्व जीवनावश्यक वस्तूंची भेट दिल्या जाते.पूर्व विदर्भातील हा मुस्लिम समाजाचा सर्वात मोठा सामूहिक विवाह सोहळा समजला जातो. सदर विवाह सोहळ्यात जवळपास वीस हजार लोकांची उपस्थिती असणार आहे.विशेष म्हणजे इतर राज्यातील नागरिकही या विवाह सोहळ्यास हजेरी लावत असतात.येत्या ८ जानेवारीला २२ जोडपी विवाहबद्ध होणार आहेत.सदर विवाह सोहळ्यास जिल्ह्यातील आणि देसाईगंज शहरातील प्रतिष्ठित नागरिक,पत्रकार,राजकीय मंडळींसह सर्वसामान्य नागरिकांनी मोठ्या संख्येने उपस्थित राहण्याचे आवाहन मुस्लिम सामूहिक विवाह सोहळ्याचे संयोजक आणि प्रमुख मार्गदर्शक हाजी बशीर पटेल सौदागर यांनी केले आहे.विशेष म्हणजे सदर विवाह सोहळ्यास विदर्भातील लोकप्रतिनिधी सुद्धा उपस्थिती दर्शविणार आहेत.