वाघिणीने तीन बछड्यांसह मिळून केली रानगव्याची शिकार…

भंडारा :-चंद्रपूरच्या ताडोबा व्याघ्र प्रकल्पातून आणलेल्या तीन वाघिणींपैकी एनटी-२ या वाघिणीने नुकताच तीन छाव्यांना जन्म दिला.हे छावे आपल्या आईसोबत जंगलात फिरताना दिसून येत आहेत. तसेच एक शिकारदेखील केली आहे.छाव्यांच्या जन्मामुळे प्राणीमित्रांमध्ये आनंदाचे वातावरण आहे.

नवेगाव-नागझिरा व्याघ्र प्रकल्पात व्याघ्र संवर्धनासाठी महाराष्ट्र वन विभागाने राबविलेल्या वाघाचे संवर्धन, स्थानांतरण या उपक्रमात आतापर्यंत एकूण तीन वाघिणींचे स्थांनतर करण्यात आले आहे.त्यात पहिल्या टप्प्यात २० मे २०२३ रोजी एनटी-१ आणि एनटी-२ या वाघिणी,तर दुसऱ्या टप्प्यात एनटी-३ वाघिणीला ११ एप्रिल २०२४ रोजी नागझिरा वन्यजीव अभयारण्यात सोडण्यात आले होते.एनटी-२ या वाघिणीने राखीव क्षेत्रात आपली जागा निर्माण केली. तिच्या हालचालींवर ट्रॅप कॅमेऱ्यांच्या मदतीने संनियंत्रण करण्यात येत आहे.कॅमेऱ्यात एनटी-२ वाघीण आपल्या तीन छाव्यांसोबत रानगव्याची शिकार करताना कैद झाली आहे.इतर दोन वाघिणींनी व्याघ्र प्रकल्पाच्या गाभा आणि बफर क्षेत्रात आपला अधिवास निर्माण केला आहे.वाघिणीने दिलेल्या छाव्यांचा व्हिडीओदेखील मोठ्या प्रमाणात व्हायरल झाला असून वन्यप्रेमींमध्ये आनंदाचे वातावरण आहे.